Vleuel-krisis in Vrystaat voor stryd teen Leeus
2010-09-28 08:04
Bloemfontein - Die Vrystaat-rugbyspan sal nie net Saterdag hier teen die Leeus en vir die res van die Curriebeker-reeks sonder sy Springbok-vleuel Jongi Nokwe moet klaarkom nie, maar moet langtermyn-planne maak om hom te vervang.
Die Cheetahs het Dinsdag die slegte nuus gekry dat Nokwe sy knieligamente geskeur en sowat agt maande buite aksie kan wees.
Dié Bok moes in Vrydag se kragmeting met die Pumas die veld weens ’n seer knie verlaat en die Vrystaatse afrigtingspan het toe al vir die ergste gevrees.
Nokwe het gister ’n skandering ondergaan en volgens Ian Morris, spandokter van die Cheetahs, het die vleuel sy kruis- en mediale knieligamente geskeur.
“Hy word Vrydag gesny. Daar sal ná die operasie meer duidelikheid wees oor hoe lank hy nie kan speel nie,” sê Morris.
Met Nokwe uit is die tuisspan in ’n doodloopstraat voor hul kragmeting met die Leeus nadat sy vleuels “opgedroog” het.
Danwel Demas het vroeër vanjaar in Italië gaan speel en MJ Mentz slyp saam met die Blitsbokke vir die Statebondspele.
Boonop wag die Vrystaters om te hoor wat die Vrystaatse hooggeregshof oor Lionel Mapoe beslis.
Mapoe is midde in ’n kontrakgeskil tussen die Vrystaat en die Haaie oor sy dienste en weier, ondanks ’n vroeëre uitspraak van ’n arbiter, om hom by die Cheetahs aan te sluit.
“Uitspraak in die hofsaak word vandeesweek verwag.
Die Vrystaat kan dus met twee senters as vleuels teen die Leeus uitdraf.
Die senter Philip Snyman speel vanjaar goeie rugby as regtervleuel in die afwesigheid van erkende vleuels.
Een van Corné Uys of JW Jonker, albei ook senters, kan nou op die ander punt ingespan word.
Ná Nokwe se besering sal die Cheetahs ook met die oog op 2011 se Super15-reeks hul vleuel-diepte moet versterk.
Die Griekwas-ster Bjorn Basson sluit hom ná die Curriebeker-reeks by die Blou Bulle aan en is dus ook vir die Cheetahs in die Super-reeks verlore.
Juis daarom kan die Blitsbok Ryno Benjamin, wat hom in 2011 by die Vrystaat aansluit, dalk gouer as aanvanklik verwag speelkans kry.
Hy het al vir die Stormers en die Lions diens gedoen.
Intussen hoop Naka Drotské, die Vrystaat-breier, dat die ekstra druk op sy span vanweë die Leeus se sege oor die Haaie die beste uit hom sal haal.
Die wenner van dié wedstryd sal waarskynlik na die halfeindronde deurdring.
“Daar is beslis meer druk op ons. Die Bulle en die Leeus kan albei nog na ’n halfeindstryd deurdring.
“Ons het nog altyd goed gedoen wanneer ons onder druk is en ek dink nie daar sal ’n probleem wees nie,” sê hy.
Bly op hoogte van al die jongste sportnuus deur Nuus24Sport op Twitter te volg.
- Sport24