Victor Matfield groet met 'n traan
2011-11-27 07:47
Johannesburg – Victor Matfield het beter as dít verdien.
Hy was sy hele loopbaan lank ’n reus onder wêreldrugby se reuse, maar Saterdag was hy magteloos om te keer dat die Wallabies sy Barbarians met 60-11 oorrompel.
Dis nie asof die 34-jarige slot en kaptein van die Baabaas nie sy kant gebring het nie. Inteendeel, hy het duikslag ná duikslag uitgevoer, maar die gebrek aan samespel en swak uitvoering het ’n saamgeflanste span gekelder.
Die Aussies se fasespel was merkbaar beter en hulle het natuurlik die besliste voordeel gehad van spelers wat mekaar goed ken.
Tog het die Wallabies se dissipline hulle in die steek gelaat – die heelagter Adam Ashley-Cooper is in die 13de minuut koelkas toe gestuur vir ’n opsetlike aanslaan en is in die 29ste minuut deur James Slipper gevolg, nadat dié stut hom aan vuilspel skuldig gemaak het.
Dit was gulde geleenthede vir die Baabaas om die punte op te stapel, maar hulle was met rustyd reeds 3-18 agter.
Die uitnodigingspan het ’n goeie oomblik of twee gehad. ’n Voorbeeld was Bryan Habana se puik breekslag ná ’n fop-aangee, maar óók dít het met ’n vorentoe aangee gesneuwel.
Australië se eerste van twee drieë het in die 25ste minuut gekom, toe Digby Ioane deur die Baabaas se swak verdedigingslyn gedans het.
’n Breinfloute deur die All Black-haker Keven Mealamu was net voor rustyd rampspoedig vir die Baabaas.
Die Wallabies het die bal terug gedra en Lachie Turner het danksy nóg ’n fout op die verdediging in die hoekie gaan afrond.
Daar was tussendeur al die eerste helfte se foute ook goeie rugby, veral aan die kant van die Aussies.
Terselfdertyd het die Baabaas dit vir hulle verbasend maklik gemaak.
Die Aussies het in die tweede helfte ses drieë gedruk.
Dit was vir die Barbarians ’n vernedering, maar nié vir hul kaptein nie.
Hy het tot op die laaste kop-en- skouers bo die res uitgetroon.
Al sal hy nooit oor daardie laaste poging tot ’n doelskop wil praat nie!
Vir die jongste sportnuus volg Nuus24Sport op Twitter.
– Sport24