Verlamde rugbyspeler wen saak teen departement

2012-11-23 11:15

Johannesburg – Die Wes-Kaapse gesondheidsdepartement moet vergoeding aan 'n verlamde rugbyspeler betaal, het die provinsie se hoërhof Donderdag beslis.

Charles Oppelt (27) is in 2002 tydens 'n wedstryd beseer en moes 15 ure lank by 'n Kaapstadse hospitaal wag voor hy behandel kon word.

Sy prokureurs het suksesvol aangevoer dat permanente skade verhoed kon word as dokters 'n sekere prosedure binne vier ure van Oppelt se ongeluk uitgevoer het.

"Toe ek die hof verlaat het ek in trane uitgebars," het Oppelt Donderdag aan die Times-koerant gesê.

"Ek het nie gehuil omdat ons die saak gewen het nie, ek het gehuil omdat my pa nie hier was om vandag te kan sien nie."

Die hof sal nog besluit hoeveel die departement aan Oppelt moet betaal.

Oppelt is beseer terwyl hy vir die Mamre-rugbyklub gespeel het.

Hy is eers na 'n nabygeleë hospitaal geneem en toe na die Groote Schuur-hospitaal gebring waar hy ure gewag het vir behandeling.

Die volgende oggend is Oppelt na die Conradie-hospitaal geneem waar dokters op hom geopereer het.

Hy het 'n jaar lank rehabilitasie ondergaan en is permanent in sy onderlyf verlam.

Volg Nuus24 op Twitter.
 

- SAPA