Varsity-reeks proefkonyn vir wêreldrugby
2012-01-24 10:00
Johannesburg. – “Spanne wat nie daarop uit is om drieë te druk nie, gaan nie wen in hierdie kompetisie nie.”
Dít is die vriendelike waarskuwing wat Duitser Bosman, uitvoerende hoof van die Varsitybeker-reeks, gegee het toe die 2012-reeks Maandag by die Blair Atholl-gholflandgoed bekendgestel is.
Bosman het verwys na die nuutste proefneming in dié vindingryke reeks waarvolgens strafdoele voortaan net twee punte werd gaan wees, maar doelskoppe drie.
Die Internasionale Rugbyraad (IRR) het spesiale toestemming aan die Varsitybeker-reeks se organiseerders verleen om dié puntestelsel op die proef te stel en sal self verteenwoordigers na wedstryde stuur om die sukses daarvan te beoordeel vir moontlike gebruik in rugby oor die wêreld.
“Ons bedoeling daarmee is om ’n kultuur van drieë druk in die Varsitybeker-kompetisies te vestig,” het Bosman gesê.
“Uiteindelik gaan rugby oor vermaak, en drieë is vermaaklik.
“Terselfdertyd moet die belang van die stelskopper gerespekteer word en daarom het ons die waarde van doelskoppe vergroot – om spanne ’n ‘bonus’ te gee om voor te mik.”
Vrese dat spanne nou minder sal omgee om strafskoppe af te staan gaan deur strenger skeidsregters in toom gehou word.
Die toevoeging van ’n Jong Turke-kompetisie is nog ’n nuutjie. Dieselfde agt universiteite wat in die Varsitybeker-reeks speel se o.20-spanne sal meeding in dié kompetisie.
Pogings word ook vanjaar aangewend om spelerskuiwe tussen universiteite, gedryf deur geldelike aanbiedings, te halt.
Voortaan sal spelers wat van universiteit verander vir die eerste jaar by sy nuwe universiteit nie Varsitybeker-rugby mag speel nie.
Tweedens sal spelers se akademiese vertonings ook onder die loep wees met die besluit dat spelers in die reeks minstens 30% van hul vakke op universiteit móét slaag om die daaropvolgende jaar weer in die reeks te mag speel.
Vir die jongste sportnuus volg Nuus24Sport op Twitter.
– Sport24
