Van den Berg groet Sharks
2010-02-09 02:26
Johannesburg - Dit is met ’n seer hart wat hy afskeid neem van die Sharks, erken Albert van den Berg.
Dié hemelbesem-slot wat menigmaal soos ’n wafferse agterspeler rieme neergelê het doellyn het, is omtrent so eie aan die Sharks soos daardie haai op motors met die rugbybal onder sy arm.
Ná 171 wedstryde het sy Sharks-loopbaan tot ’n einde gekom en begin hy op 1 Maart ’n nuwe hoofstuk by die Tweedeliga-klub Canon in Japan.
“Ek wil nog baie graag vir die Sharks speel, maar die realiteit is ek is nie weer ’n kontrak aangebied nie. Ek het my 10 jaar by die Sharks baie geniet en ons was soos een groot, gelukkige gesin.
“Ek kan egter nie net rondsit en hoop van die slotte kry seer dat ek dalk later weer in die Curriebeker-reeks gebruik word nie,” sê Van den Berg.
“Dit is nie hoe ek dinge doen nie. Ek geniet nog my rugby en voel ek is nog mededingend. Daarom het ek die kans gegryp toe ek die kontrak in Japan aangebied is.
“Die Sharks wou hê ek moes met afrigting op junior vlak betrokke raak, maar ek wil nog eers speel en sal oor so paar jaar dink aan afrigting.
“My hoogtepunt by die Sharks was ongetwyfeld toe ons die Curriebeker in 2008 gewen het. Die Curriebeker-reeks sal ek die meeste van alles in ons rugby mis. Daar is darem maar niks wat daarby kom nie,” erken hy.
“Ai, as ek nou so op televisie sien hoe adverteer hulle die Super14, raak my hart darem baie seer. Ek wil so graag daarby betrokke wees, maar nou ja, dit is maar hoe dinge gaan,” sug hy.
Van den Berg, wat 51 keer vir die Springbokke gespeel het, onthou nog goed toe hy sy debuut vir die eertydse Vaaldriehoek teen Wes-Transvaal in 1994 gemaak het.
“As jy klaar gestort het ná ’n wedstryd, het daar ’n koevert met R50 in vir jou gewag.
“Rugby hier in Suid-Afrika was baie goed vir my en het ook baie sakegeleenthede vir my oopgemaak,” se dié lid van die seëvierende Wêreldbeker-groep van 2007.
“Ek is glad nie spyt oor hoe dinge vir my uitgewerk het in my rugbyloopbaan nie.
“Ja, dit sou lekker gewees het om die Super14 ook te kon wen, maar ag wat, dit was nie vir ons bestem nie,” sê hy van die geleentheid teen die Bulls in die eindstryd toe dit wou lyk of hy die wendrie gedruk het, maar Bryan Habana die Sharks-harte in beseringstyd gebreek het.
- Sport24
- Beeld