Unies verdedig wit spanne
2011-08-14 10:01
Kaapstad - Rugby-unies is op bestuursvlak getransformeer, maar dit is “moeiliker” om groter verskeidenheid op die speelveld te verseker.
Dit is die reaksie van provinsiale rugbybase nadat Oregan Hoskins, president van die Suid-Afrikaanse Rugbyunie (Saru), verlede week teenoor Rapport sy ontevredenheid uitgespreek het oor sekere spanne wat nog “leliewit” is.
Hoskins het bevestig dat hy ’n maand gelede reeds ’n brief aan provinsiale unies gestuur het waarin hy hulle roskam omdat spanne in vanjaar se Curriebeker-kompetisie, asook in die nasionale o.21- en o.19-reekse, te min gekleurde spelers insluit.
Provinsiale rugbybase het die afgelope week hul transformasie-programme by navraag verdedig.
Herman Abrahams, adjunk- uitvoerende hoof van die Westelike Provinsie, het toegegee: “Daar kort transformasie-strukture.”
Maar hy voeg by: “Ons bestuursposisies is swart en die kritici moet nie net kyk na die vyftien spelers wat uit die tonnel draf nie.”
Daar moet jaarliks teikens vir swart spelers gestel word, sê hy.
“As ons die inname van swart spelers van onder af wyer kan maak, sal meer spelers by die senior spanne uitkom.”
Barend van Graan, die Blou Bulle-maatskappy (BBM) se uitvoerende hoof, sê hulle werf net die beste beskikbare talent.
Volgens hom is die transformasie-syfers 21,7% in die o.19-span, 18,2% in die o.21-span, en 18,2% in die senior spanne.
Van Graan sê daar moet in ag geneem word dat hul beste gekleurde spelers nie vir die Curriebeker-kompetisie beskikbaar is nie vanweë diens in die nasionale spanne.
Harold Verster, president van die Vrystaat-rugbyunie, sê transformasie op praktiese vlak vat lank. “Op die direksies is daar mense van kleur.
“Ons het al verskeie swart spelers ontwikkel, net om hulle aan ander unies af te staan.”
Eugene van Wyk, uitvoerende hoof van die Griffons, sê hul getal swart spelers is baie hoog omdat daar swart bestuurslede in besluitnemingsposisies is.
Intussen het bronne binne Saru se komitee vir transformasie en ontwikkeling gesê daar is Woensdag op ’n vergadering kommer uitgespreek oor mislukte transformasie op provinsiale vlak.
Vingers is glo na die noordelike unies gewys.
Die vrees is uitgespreek dat die regering binnekort weer kwotas kan instel omdat daar nie sigbare vordering met transformasie is nie.
Jurie Roux, uitvoerende hoof van Saru, het aan Rapport gesê Saru is besig om ’n beleidstuk oor transformasie op te stel. Dit word in oorleg met die departement van sport en ontspanning gedoen.
Die hoop is dat daar deur ’n inklusiewe proses genoeg talentvolle gekleurde spelers geïdentifiseer kan word om in die toekoms op die hoogste vlakke te kan speel.
Makhaya Jack, ’n TV-kommentator en voormalige speler van Saru (die ou gesegregeerde nasionale unie vir bruin spelers), het gesê die minister van sport moet ’n ultimatum aan provinsies stel om te transformeer. Die minister moet strukture afhanklik van Saru skep om transformasie te monitor en evalueer.
Hy sê Suid-Afrikaanse spanne moet minstens 60% swart wees.
“Saru sit op ’n transformasie-handves, maar niks gebeur nie.
“Jy sien goeie swart spelers in die Grant Khomo- en Cravenweek-spanne, maar hulle raak weg in die Vodacom- en Superrugby-reeks, asook in die nasionale spanne.”
Absa, hoofborg van die Springbokke en Saru se nasionale kompetisies, het die afgelope week gesê hul omstrede standpunt verlede jaar – oor gebrekkige rugby-transformasie – “bly onveranderd”.
Vir die jongste sportnuus volg Nuus24Sport op Twitter
- Rapport