Uitval in Wallabies-kamp

2009-08-13 11:24

Sydney – Humeure het Donderdag amper handuit geruk by die Wallabies se kamp toe James O’Connor, die jong heelagter, en die flank Phil Waugh by ‘n oefensessie in ‘n bakleiery betrokke geraak het.

Hulle het nie handgemeen geraak nie, maar die twee moes deur spanlede van mekaar weggetrek word.

“Dis goed, ons raak kompeterend en ek dink nie een van ons wou terugstaan nie. Dit was alles in goeie gees,” het O’Connor gesê.

“Ons het besluit ons moet ‘n meer fisieke benadering hê. Dit is wat ons Woensdag na die oefening toe gebring het en dit was nogal intens.”

Robbie Deans, die Australiese afrigter, het die konfrontasie verwelkom.

“Die feit dat daar ‘n bietjie van ‘n onderonsie was tydens die oefensessie is nie ‘n slegte ding nie, want in ‘n wedstryd kan jy nie terughou nie.”

- Reuters