UJ behaal rekord-oorwinning
2012-03-05 23:06
Kaapstad – Die Universiteit van Johannesburg (UJ) het die grootste Varsity Cup-oorwinning in die geskiedenis van die toernooi behaal toe hulle die TUT Vikings met 93-0 geklop het in die vyfde ronde van die toernooi Maandagaand.
Buiten UJ se groot oorwinning – te danke aan onder meer 33 punte vir Worsie Kotzé en vier drieë vir sy mede-Namibiër Chrysander Botha – het Maties en UP-Tuks ook oorwinnings behaal, met UCT en NWU-Pukke wat op dramatiese wyse 29-elk gelykop gespeel het.
Die Ikeys was in Kaapstad met minder as 10 minute oor nog 29-13 voor, maar die Potchefstroomse span het twee drieë gedruk om die gelykop-uitslag af te dwing en waarskynlik UCT se hoop op ‘n halfeindstryd te beëindig.
Die Maties het ‘n sterk genoeg voorsprong van 18-0 teen halftyd in ‘n oowinning van 42-26 teen NMMU in Port Elizabeth omskep. Die Madibaz het 26 punte in die tweede helfte aangeteken teenoor die Maties se 24. Tuks het ook ‘n maklike oorwinning van 48-18 oor ‘n uitgedunde Shimlas-span (weens beserings) behaal.
Soos dinge nou staan is UCT, die verdedigende kampioene, in die sesde plek op die punteleër, met nege punte na vyf wedstryde.
Die Madibaz is ‘n punt voor hulle met 10. Pukke het 14 punte, UP-Tuks en UJ het elk 20 en die onoorwonne Maties is bo-aan die punteleër met 22 punte. Shimlas is in die sewende plek met ses punte en TUT het geen punte nie.
- Volg Nuus24Sport op Twitter
