Tertius wil loopbaan op koers kry by Griffons
2011-11-02 10:07
Bloemfontein. – Die skrumskakel Tertius Carse kan volgende jaar weer sy rugbyloopbaan by die Griffons op koers kry.
Ná byna ’n jaar langs die kantlyn sal Carse hom in Januarie 2012 vir ’n jaar lank by die Perses aansluit.
Die 28-jarige Carse het vroeër vanjaar ’n ernstige skouerbesering opgedoen en daarom slegs enkele wedstryde in die Vodacombeker-reeks vir die Vrystaat gespeel.
Hy het intussen twee operasies, in April en Augustus, aan sy regterskouer ondergaan en was sedertdien nie weer in aksie nie.
Dié veelsydige agterspeler, wie se Vrystaat-kontrak einde Oktober verstryk het, was in 2011 ook in die Cheetahs se vergrote Super Rugby-groep.
Volgens Carse het hy ook ’n aanbod van die Luiperds ontvang, maar wil hy graag in die Rosestad aanbly.
Carse hoop hy kan sy loopbaan ’n tweede asem by die Griffons gee. “Hopelik kan ek weer my loopbaan in die volgende twee of drie jaar op koers kry.
“Ek het weens beserings in die laaste jaar nie baie rugby by die Vrystaat gespeel nie.
“Dit was ook die geval toe ek my aanvanklik by Griekwas aangesluit het. Ek het in die eerste jaar nie baie rugby in Kimberley gespeel nie, maar was later selfs Curriebeker-kaptein.
“Ek is baie positief oor die skuif. Dalk kan ek volgende jaar ’n goeie jaar hê en miskien sien iemand anders my weer raak,” sê hy.
Volgens Oersond Gorgonzola, die Griffons-afrigter, is Carse besig met rehabilitasie en behoort hy in Januarie beskikbaar te wees.
Dié breier is verheug oor die skuif, aangesien Carse ook senter en vleuel kan speel.
Die Perses se ander skrumskakels is Andries Mahoney en Oswald Nortjie. Nortjie het vanjaar vir die Griffons se o.21-span uitgedraf en kan ook heelagter en vleuel speel.
Volgens Gorgonzola is daar ’n moontlikheid dat die skrumskakel Hendrik van der Nest ook weer beskikbaar kan wees. Van der Nest is ’n onderskatte skrumskakel en het vanjaar vir die Pumas in die Curriebeker-reeks se Premierliga uitgedraf. Hy is voorheen al deur die Pumas aan die Griffons beskikbaar gestel.
Gorgonzola sê die skrumskakel Enrico Schultz het weens herhaalde enkelbeserings besluit om sy stewels op te hang.
Volgens Gorgonzola het Dan van den Heever, wat vanaf 2002 tot 2004 by die Perses betrokke was, ook weer as fiksheidskundige by sy span aangesluit.
Die breier sê hy sal ook ná 2012 se?Varsitybeker-reeks?weer?’n paar Shimlas soos die slot Gavin Annandale, die losvoorspeler Willie Britz, die flank Erik le Roux en die losskakel Reinhardt Erwee beskikbaar hê.
Vir die jongste sportnuus volg Nuus24Sport op Twitter.
– Sport24