'Te moeilik om Deans te vervang' – Mortlock

2012-11-14 11:20

Sydney – Australië se oud-kaptein Stirling Mortlock meen Robbie Deans sal nie as afrigter van die sukkelende Wallabies afgedank word nie, omdat dit te moeilik sal wees om hom voor die Britse en Ierse Leeus-toer te vervang.

Deans is sedert Australië se swak vertoning in die Rugbykampioenskap-reeks onder geweldige druk en die Wallabies se vernederende nederlaag van 6-33 laas naweek teen Frankryk het sake net vererger.

Mortlock het egter gesê met die Britse en Ierse Leeus se reeks van drie toets aanstaande jaar in Australië, is dit te laat om Deans te vervang.

"Ek dink dit is baie moeilik wanneer jy die Leeus in die prentjie bring – die grootste gebeurtenis vir Australiese rugby buiten die Wêreldbeker," het Mortlock Woensdag aan joernaliste gesê.

"Die realiteit om iets soos dit te doen (Deans af te dank) sal nie goed wees vir die span en dit wat ons probeer bou met die oog op die Britse Leeus nie."

Deans het Bob Dwyer die naweek verbygesteek as die Wallaby-afrigter met die meeste ervaring.

Die wedstryd teen die Hane was sy 68ste as afrigter van Australië, maar slegs 39 daarvan is egter gewen.

Australië se volgende kragmeting is Saterdag teen Engeland op Twickenham.

Vir die jongste sportnuus volg Nuus24Sport op Twitter.

- Sapa - AFP