Taai toets wag op SA buks
2009-11-11 06:51
PIETER JORDAAN
Dit is ook maar ’n goeie ding dat die Springbok-senter Adrian Jacobs aan druk gewoond is, want hy gaan Vrydagaand deeglik getoets word wanneer hy as binnesenter teen die fisieke Franse uitdraf.
Jacobs is gister as Jean de Villiers se plaasvervanger in die Bokke se nr. 12-rugbytrui gekies en sal Jaque Fourie se sentermaat in die middelveld teen die Hane in die Stade Municipal in Toulouse wees.
Dié verandering beteken dat die Bokke in grootte heelwat prysgee, maar niks gaan verlore in terme van skeppende vernuf nie.
Jacobs is eintlik ’n buitesenter en hoewel die Franse ’n jong senterpaar in Maxime Mermoz (23) en Yann David (21) gekies het, is hulle sterk hardlopers wat sonder twyfel hul visier op Jacobs se verdedigingskanaal sal hê.
Die Springbok-afrigter, Peter de Villiers, het erken dat die Bokke ’n gehalte-speler verloor het toe sy naamgenoot besluit het om sy rugby oorsee voort te sit.
“Maar is ons nie net geseënd om ouens soos dié (Jacobs) te kan inbring nie? Ek het volle vertroue in die manne wat nou inkom.”
Die beginspan toon vier veranderings van die span wat in die laaste Drienasies-toets teen Nieu-Seeland in Hamilton gespeel het.
JP Pietersen is terug as regtervleuel, Jacobs as binnesenter en Zane Kirchner is in die beginspan as heelagter in die plek van Frans Steyn wat nou ook oorsee speel.
“Ons is albei ervare genoeg om in enige posisie te kan speel. Adi is ’n goeie rugbyspeler en opgewasse vir die taak,” het Fourie gesê.
“Die Franse het ’n fisieke agterlyn gekies, maar ons het ons huiswerk gedoen op die verdediging.”
Fourie glo nie die feit dat die Franse senterpaar onervare is maak die Hane se middelveld meer kwesbaar nie.
Dié groot senter het self in die Drienasies-reeks laas rugby gespeel en was ’n toeskouer in die Curriebeker-reeks terwyl eers ’n skorsing en toe ’n kontrakdispuut hom van die veld gehou het.
“Ek was die Maandag toe ons bymekaargekom het nog so ’n bietjie verroes, maar hierdie is my werk en ek is professioneel.
“Ek het my tyd af in die gimnasium deurgebring. En al sal die eerste 10 minute (van die toets) dalk ’n bietjie taai wees, het ek my die laaste tyd sielkundig en fisiek voorberei.”
Fourie sê hy is honger om weer te speel en sien uit om van sy kombinasie met Jacobs ’n sukses te maak.
“Ons oefening vandag (gister) was seker die beste een wat ek die hele jaar gesien het.”
Die Bok-agttal lyk gedug met die beproefde vaste vyf almal op hul pos. Heinrich Brüssow en Schalk Burger as die flanke kan ’n nuwe dimensie aan die voorspel gee met Ryan Kankowski as die agtsteman in die beseerde Pierre Spies se plek.
Die enigste verrassing was onder die plaasvervangers, waar twee stutte, Wian du Preez en CJ van der Linde, onder die vyf voorspeler-plaasvervangers tel.
Du Preez, Van der Linde en Adriaan Strauss het hulle eers vandeesweek by die Bok-groep ingesluit ná beserings aan voorrymanne dit genoodsaak het.
Ruan Pienaar en Wynand Olivier is die enigste agterspelers op die bank.
- Die Burger