Super14-breiers wag in spanning op Div
2010-01-18 08:26
Kaapstad - Die Curriebeker-reeks en selfs die jaareind-toer bied vir Suid-Afrika die beste geleentheid om sy sleutelspelers vir aanstaande jaar se Wêreldbeker-rugbytoernooi in Nieu-Seeland vars te hou, glo die Cheetahs se afrigter, Naka Drotské.
“As ek Peter de Villiers (Springbok-afrigter) was, sou ek versoek dat die Bokke aan die Curriebeker onttrek word en dalk ook aan die einde van die jaar. Hulle is nog nie moeg in die Super14-reeks nie,” het Drotské aan Sport24 gesê.
Hy het daarop gewys dat ’n soortgelyke strategie in 2006 gevolg is en dat dit wys kan wees om vanjaar 10 tot 12 sleutelspelers uit die Curriebeker te haal.
Drotské is saam met Suid-Afrika se ander Super14-breiers gepols oor die kwessie van rus vir top-Bokke.
Daar was nog nie vanjaar kontak tussen hulle en De Villiers daaroor nie, en die breiers wag nog in spanning om te hoor of daar verwagtinge in die Super14-reeks sal wees.
De Villiers was nie vir kommentaar beskikbaar nie.
Die meeste van die spelers wat moontlik geraak kan word, is by die Blou Bulle, Sharks en Westelike Provinsie gekontrakteer.
“Al speler wat by ons geraak kan word, is Heinrich Brüssow. Hy het Maandag eers begin oefen en het ’n maand af gehad. As hy voel dat hy rus benodig, sal ek gehoor gee,” sê Drotské.
Ofskoon die Lions nie werklik geraak sal word nie, het hul breier, Dick Muir, die versekering gegee dat hy “ten volle” aan versoeke gehoor sal gee.
“Ons streef almal na ’n nasionale oplossing. Ek dink ’n mens moet individuele gevalle van spelers in ag neem en nie deur die bank ’n besluit neem nie.”
Die Stormers se afrigter, Allister Coetzee, wil sover moontlik konsekwent in sy spankeuses bly. Dié beleid het vir hom welslae in die Curriebeker-reeks gebring.
“Waar ons kan help, sal ons afhangende van die situasie die versoek oorweeg. Ek is bewus van die groter prentjie en weet nog nie wie die spelers is wat Peter oormerk nie,” sê hy.
“Hoe langer ’n groep saam speel, hoe beter sal hy vaar. Ek sal nie net kyk om spelers te roteer nie. Die kombinasies moet mekaar vind. ’n Speler verbeter net as hy speel.
“Ons streef ook ons eie doelwitte na…ons het seker gemaak dat die Bokke die vereiste vier weke se rus kry.”
John Plumtree, afrigter van die Sharks, het ook bevestig dat versoeke oorweeg sal word.
“Dit maak dit natuurlik baie makliker as jy diepte het. My ervaring is ook dat spelers verkies om te speel en nie daarvan hou om te rus nie. Nieu-Seeland het ook al harde lesse geleer deur spelers uit die Super14-reeks te haal.”
Nieu-Seeland se rus-strategie deur gekontrakteerde All Blacks vir verskeie rondes in die Super14-reeks in 2007 te laat rus, is onder andere deur die voormalige Crusaders-afrigter Robbie Deans as een van die redes vir Suid-Afrika se welslae daardie jaar beskou.
Deans het aangevoer dat Suid-Afrika baie selfvertroue uit die Bulls en Sharks se welslae in die Super14-reeks in 2007 geput het.
Die kampioene, die Bulls, het ’n positiewe ingesteldheid teenoor nasionale belang, hoewel die druk natuurlik op hulle is om aan te hou presteer.
“Ons ondersteun vir Peter de Villiers en ek het ’n goeie verhouding met hom. Ek is seker dat ons ’n goeie gesprek sal hê oor hoe die spelers bestuur moet word… ons sien die groter prentjie,” sê die Bulls se afrigter, Frans Ludeke.
- Die Burger
- Die Burger