Strydros onthul ‘wenplan’ teen Bokke
2010-11-19 10:03
Edinburg - Nathan Hines glo sy insluiting as steelkantflank sal vir Skotland ’n teenvoeter teen Suid-Afrika se gedugte lynstaanspel in Saterdag se rugbytoets op Murrayfield bied.
“Dit het vir my ook as ’n verrassing gekom. Andy Robinson (Skotland se afrigter) het my Maandag ingeroep en gevra of ek dit sal kan hanteer. Dis geen probleem vir my nie en ek dink dit kan help om ons lynstaanspel op te skerp.
“Suid-Afrika het goeie lynstaanspringers, maar nou het ons meer opsies,” het Hines gesê.
Skotland sal die bal so ver moontlik van die Springbok-kaptein, Victor Matfield, in die lynstane wil hou. Met ’n slotpaar van Richie Gray en Scott Macleod, tesame met Hines op die flank, is dit vir die tuisspan ’n besliste moontlikheid.
Hines se 65 toetse maak hom die mees ervare speler in die Skotse span en hy sien daarna uit om met die Bok-slotpaar van Matfield en Bakkies Botha kragte te meet, al is dit nie hierdie keer as regstreekse teenstander nie.
“Dis ouens teen wie ek baie graag speel.
“Hulle speel die spel op die manier wat ek daarvan hou – kliphard, maar skud ná die wedstryd hand en drink saam ’n bier,” het hy gesê.
“Bakkies en Victor speel al lank saam. Die rede daarvoor is dat hulle goed is en mekaar puik aanvul.”
Hines weet ook presies wat om van die Bokke te verwag.
“Hulle is baie direk en fisiek. Dis vir jare al die Bokke se resep – groot ouens wat reguit op jou afstorm. Jy moet net jou man in daardie konfrontasie staan.
“Dis egter ’n moeilike ding om te doen.
“Ek dink nie die All Blacks is so fisiek soos die Bokke nie. Hulle stuur nie baie spelers losskrums toe nie en poog om vir die agterspelers ruimte te skep.
“Suid-Afrika verwag van sy voorspelers om leiding te gee.”
Bly op hoogte van al die jongste sportnuus deur Nuus24Sport op Twitter te volg.
- Sport24