Cheetahs - Lions: Stryd van senters
2010-10-02 11:24
Bloemfontein - Dit is nie aldag dat agt senters mekaar op ’n rugbyveld aanvat nie en daarom kan die werkverrigting van die Vrystaat of die Leeus se viertal-senters vandag hier in ’n Curriebeker-wedstryd dalk die deurslag gee.
Albei spanne gebruik twee senters as vleuels in dié belangrike kragmeting wat as ’n kwarteindstryd in die reeks beskou kan word.
Gevolglik sal die vleuels se vertonings in die kollig wees en kan hul bydrae ’n enorme impak op hul spanne se welslae in dié wedstryd en in die reeks hê.
Die tuisspan moes noodgedwonge nóg ’n senter as vleuel kies nadat die Springbok Jongi Nokwe ’n kniebesering opgedoen het. In die afwesigheid van die Blitsbok Lionel Mapoe, wat in ’n kontrakgeskil tussen die Vrystaat en die Haaie gewikkel is, speel die Vrystaters van die begin van die reeks af met die senter Philip Snyman op regtervleuel. Die besoekers speel met die senters Jannie Boshoff en Deon van Rensburg as vleuels.
Hulle is deel van ’n begeesterde span wat die bal graag versprei en kan dus gereeld in aksie wees.
Pieter Jordaan berig dat trots, passie en omgee vir mekaar – dié dinge wat die Leeus-breier, John Mitchell, sedert sy aankoms in Johannesburg só ywerig by sy spelers probeer tuisbring het – teen die Vrystaat nodig sal wees.
Selfs al het die Leeus hul veldtog ná ’n swak begin in die reeks met ’n klomp uithaler-vertonings in ’n sukses verander, was ’n oorwinning oor ’n sterk teenstander in ’n wegwedstryd hulle nog nie beskore nie.
Die Cheetahs het gewys hoe goed hulle onder druk kan verdedig toe hulle die Blou Bulle onlangs op Loftus Versfeld geklop het. Wat die Leeus te doen staan, is om hul besit met selfs meer geduld as die Bulle te behou. Goeie besit in die hande van Jano Vermaak, Elton Jantjies en Doppies la Grange beteken probleme vir teenstanders.
- Volg Nuus24 Sport op Twitter.
- Sport24