Stryd van kampioenspanne
2010-07-09 09:57
Johannesburg - Die Curriebeker-kampioen en die Eerste Liga se kampioen van 2009 saam in die kryt in die eerste stryd in vanjaar se Curriebeker-rugbyreeks op Loftus Versfeld in Pretoria...
Die Blou Bulle sê die Pumas vandag die stryd in die Jakarandastad aan nadat die Bulle hul geliefde Loftus Woensdag weer in gebruik geneem het nadat Fifa dit vir WB 2010 beset het.
Met die Bulls se Super14-baanbrekerswerk in die Orlando-stadion in Soweto iets van die verlede, is die Bulle ywerig om toeskouers op Loftus weer met hul spel te bederf.
Hulle moet dit doen onder leiding van hul haker, Gary Botha, wat ná ’n lang afwesigheid weer terug in die Ligblou-trui is. “Soweto was ongelooflik vir ons en ons het die ‘reis’ geniet. Maar eindelik is Loftus steeds ’n spesiale plek vir die Bulle,” het Botha gesê.
“Tog put ons trots daaruit om ’n goeie rugbywedstryd op enige plek te kan speel.”
Spelers soos Botha, Derick Kuün, John Mametsa en Jaco van der Westhuyzen het ’n groot taak om leiersrolle in ’n jongerige Bulle-span te speel.
“Die ouens moet nou werklik hul kant bring. Die dae is verby dat ons, as die meeste van ons Bokke weg is, in sak en as daaroor moet wees,” sê die Bulle se kaptein.
Vir die Ligbloues se afrigtingspan sal die vertoning van ’n splinternuwe skakelpaar, Ruan Snyman en Jacques-Louis Potgieter, van groot belang wees.
Jimmy Stonehouse het as breier wondere met die Pumas verrig, maar ’n sege oor die Bulle op Loftus is straks wensdenkery. Van sy sleutelspelers begin weens beserings op die plaasvervangersbank.
Die spanne is:
Blou Bulle: Jaco van der Westhuyzen, Gerhard van den Heever, Stephan Dippenaar, Stefan Watermeyer, John Mametsa, Jacques-Louis Potgieter, Ruan Snyman, Gerrit-Jan van Velze, Derick Kuün, Deon Stegmann, Fudge Mabeta, Flip van der Merwe, Werner Kruger, Gary Botha (k), Dean Greyling. PLAASVERVANGERS: Bandise Maku, Bees Roux, Juandré Kruger, CJ Stander, Danie Faassen, Francois Brummer, Hayden Groepes.
Pumas: Carl Bezuidenhout, Duwayne Smart, Ashwin Scott, Jovan Botha, Shaun Venter, Ricardo Croy, Tian Meyer, Junior Bester, Eduan van der Walt, Corné Steenkamp, Marius Coetzer, Luhan Velthuizen, Ashley Buys, Hannes Franklin (k), Dawie Steyn. PLAASVERVANGERS: Torsten van Jaarsveld, Ronnie Uys, Willem Serfontein, Doppies le Roux, Jacques Coetzee, Elgar Watts, Allistair Kettledas.
Skeidsregter: Stuart Berry.
Afskop: 19:10.