Strauss sê sy span probeer kalm bly
2011-10-22 08:16
Vir die eerste keer in 12 jaar sê die Goue Leeus ’n ander span die stryd in die Curriebeker-halfeindstryd op hul eie tuisveld aan.
’n Curriebeker-eindstryd en die hoop op ’n tiende Curriebeker-titel wag op die Goue Leeus se rugbyspan as hulle vandag met die sterbelaaide Westelike Provinsie (WP) op Coca-Cola-park kan afreken.
Tagtig minute se genadelose rugby lê voor vir die manne van Schalk Burger, Suid-Afrikaanse rugby se ware honderdpersenter, en dié van die gewilde nuwe leier van die Leeu-trop, die bebaarde Joss Strauss.
“Ek is geweldig opgewonde,” het Strauss gesê.
“Ek was nog nie daar (in ’n halfeindstryd) nie, so ek kan nie beskryf hoe dit gaan wees nie, maar ek sien uit daarna.”
Die WP-span is die week met verskeie Springbokke gelaai, terwyl ’n verswakte Leeu-span ’n week gelede pak gekry het teen die Haaie.
Maar die afrigter, John Mitchell, en sy Leeus glo hulle is gereed en Strauss glo ook nie die Leeus se gebrek aan ervaring van uitklopwedstryde is ’n slagyster nie.
“Ons het ouens in die span wat al in die situasie (’n halfeindstryd) was, al was dit dalk in ander unies,” het Strauss oor die teenwoordigheid van ervare spelers soos Alwyn Hollenbach, Wikus van Heerden, CJ van der Linde en Butch James gesê.
“Hulle sal sorg dat die jonger ouens gerat is vir dit wat wag.
“Die gees in die span is ongelooflik en dit is so ’n groot eer vir ons.
“Ons probeer om net kalm te bly,” was die baardman se siening vroeër die week.
– Vir die jongste sportnuus volg Nuus24Sport op Twitter.
– Sport24