Strauss en De Villiers reg om te toer
2012-10-31 18:08
Kaapstad – Jean de Villiers en Adriaan Strauss is albei fiks verklaar om saam met die Bokke na Ierland, Wallis en Engeland te toer.
Craig Roberts, die Springbokke se spandokter, het Woensdag bevestig dat die spelers hul fiksheid bewys het nadat hulle goed gereageer het op behandeling vir beserings.
“Strauss hardloop al en hy is gereed om aan ‘n volle oefensessie deel te neem,” het Roberts gesê.
“Ek is ook gelukkig met Jean se vordering. Hy het die afgelope tyd saam met die WP geoefen en hul personeel het my laat weet dat hy herstel het.”
Strauss het sy knie in verlede naweek se promosie-relegasie-wedstryd teen die Kings beseer.
De Villiers het sy dyspier sowat twee weke terug tydens ‘n oefensessie by die WP beseer.
Die ander groot besering bekommernis vir die Bokke is die van die oopkanflank Francois Louw. Louw het sy nek beseer toe hy vir Engelse klubspan Bath gespeel het.
“Ek het met Flo (Louw) gepraat en sy nekbesering vorder goed, dit lyk of hy al die naweek vir Bath kan uitdraf.”
“Dit was ‘n lang en harde seisoen, so die toer aan die einde van die jaar sou altyd moeilik wees.”
Die afrigter, Heyneke Meyer, het gesê dat die beserings die afgelope tyd baie by hom gespook het en dat hy voel die tyd is reg om nou die sisteme van die nasionale span te verander.
Bismarck du Plessis, Andries Bekker, Pierre Spies, Johan Goosen, Frans Steyn en Bryan Habana is tans almal op die krukkelys.
Meyer het gesê dat Suid-Afrika iets by Nieu-Seeland kan leer en spelers vir langer tydperke moet laat rus om hul fiksheid te verseker.
“Sonder om te krities te klink oor hoe dinge hier gedoen word sal ek daarvan hou as daar ‘n paar veranderinge in die sisteem kan plaasvind,” het Meyer gesê.
“Ek dink Nieu-Seeland kry dit reg. Hulle beplan om vir Richie McCaw vir hul Europese toer te laat rus.”
“Daar is regtig ‘n paar goeie spelers beseer as mens kyk na ouens soos Frans Steyn en Bryan Habana.”
“Die jong ouens sal goed doen, maar as daar name soos Steyn en Habana in jou span is dan is jou agterlyn uitstekend.”
Vir die jongste sportnuus volg Nuus24Sport op Twitter.
– Sport24
