‘Stormers wil S14-geskiedenis maak’
2010-01-14 18:35
Johannesburg - Die Stormers het dit as mikpunt gestel om met die beste Super14-veldtog in hul geskiedenis vorendag te kom.
Só sê die Stormers-slot Anton van Zyl, wat waarskynlik Andries Bekker se slotmaat sal wees wanneer die Kaapse streekspan se veldtog op 13 Februarie teen die Lions in Johannesburg begin.
“Die hoë verwagtinge wat ondersteuners van ons koester, is heeltemal geregverdig. Die span het van die einde van verlede jaar se Super14-reeks en dwarsdeur die Curriebeker belofte getoon, en daar is ook nou nuwe aanwinste,” sê Van Zyl.
“Ons werk hard om die volmaakte pakket te word, nie as individue nie, maar as ’n span.
“As span wil ons met die beste Stormers-vertoning ooit vorendag kom, maar op ’n meer praktiese vlak en in terme van visie, wil ons net elke week as span verbeter.
“Ons wil beter as enige Stormers-span voor ons – as ’n span – vertoon.”
Wat vorige prestasies betref, het die Stormers ’n beskeie geskiedenis.
Hulle het nog net in 1999 en 2004 die Super14-halfeindronde gehaal, maar was ook vir ’n goeie paar jaar Suid-Afrika se voorste span toe al dié land se spanne gesukkel het om hond haaraf te maak.
In ieder geval is dit ook lekker om te hoor dat die Stormers “as span” goed wil vaar. Selfs die groep van 1999 is deur ego’s teruggehou.
“Daar is ’n groot klem op harmonie in spanverband om te verseker dat almal in dieselfde rigting trek,” sê Van Zyl.
“Ons het verlede week byvoorbeeld tydens ons oefenkamp tyd weg van rugby spandeer om te verseker dat almal mekaar leer ken. Dis belangrik dat almal in moeilike tye bymekaar staan.”
Met Adriaan Fondse nog op die krukkelys, behoort Van Zyl vroeg in vanjaar se veldtog ’n prominente rol te vertolk.
“As ek gelukkig genoeg is om as nr.4-slot gekies te word, sal dit fantasties wees. Andries Bekker is ’n wêreldklas-speler en dis vir my belangrik om net deel van die span te wees,” sê Van Zyl.
“Dit gaan nog ’n rukkie vir Fondsie neem om sy fiksheid te herwin, maar hy is ’n puik slot en daar gaan groot wedywering wees.”
Behalwe vir die gehalte van sy vertonings, is die 29-jarige Van Zyl ook ’n sterk leier en kan hy ’n belangrike rigtingwyser in spanverband wees.
“Die spanbestuur skep ’n kultuur waar elke speler ’n leier in sy eie posisie móét wees. Dit gaan daaroor om vir jou rol in die span verantwoordelikheid te neem,” sê Van Zyl.
“As dit my taak is om leiding aan jonger spelers te verskaf, doen ek dit met graagte.”
Hierdie kan ook ’n jaar wees vir Van Zyl om sy stem vir die Groen-en-Goud dik te maak. Sy bestendigheid en intelligensie maak van hom ’n kandidaat.
“Enige Suid-Afrikaanse speler wat sê dat hy nie sy visier op die Groen-en-Goud het nie, vertel ’n leuentjie,” sê Van Zyl.
“Ek weet my kanse het net soveel met my vertonings as die span s’n te make.
“My primêre fokus is om myself in die span te vestig en ’n bydra tot sy vertoning te lewer.
“Jy lyk beter in ’n wenspan. Die Bokke is ’n doelwit, maar die fokus is om toe te sien dat die span sy doelwitte bereik.”
- Die Burger