Stefan Terblanche glo in gesoute Haaie
2010-10-29 09:42
Pretoria - Daar is genoeg ervaring in dié span om Saterdag weer die Curriebeker te wen en diegene wat onseker is, hoef maar net ná die speler langs hom te kyk vir inspirasie.
Só glo die Haaie se Stefan Terblanche, wat Saterdag in sy vierde eindstryd vir dié rugbyspan speel, maar in sy eerste as kaptein.
“Ons het dalk jong outjies soos Pat Lambie en Lwazi Mvovo, maar daar is genoeg ervaring aan hulle binne- en buitekante, sou hulle hulp (teen die WP) nodig hê,” het hy oor die span gesê wat Donderdag aangekondig is.
Die Haaie se breier, John Plumtree, het by dieselfde spelers gehou wat hulle aan die einde van die liga-deel in Absa se reeks bo-aan die puntelys gekry het. Dié groep moet nou ook die span ál die pad neem en die gesogte beker in Durban laat agterbly.
Slegs Odwa Ndungane het nie in die halfeindstryd teen die Blou Bulle begin nie. Hy vervang JP Pietersen as vleuel, iets wat hy reeds ná 20 minute van dié stryd moes doen toe laasgenoemde ’n dyspier geskeur het.
Die res van die span het die grootste deel van die seisoen vir die Haaie uitgedraf, met selfs Tendai Mtawarira en Bismarck du Plessis, wat in die vroeë deel van die reeks gereeld gespeel het. Mtawarira sal vanjaar in sy negende wedstryd vir die Haaie speel en Du Plessis in sy agtste.
Die enigste Springbok wat nie gereeld vir die Haaie gespeel het nie is hul vaskopstut, Jannie du Plessis, wat maar in sy vierde wedstryd in die reeks sal speel.
Nie dat dit die dokter in die span veel sal pla nie. Du Plessis het immers in 2005, 2006, 2007 en 2008 in eindstryde gespeel en behoort geen probleme te hê om by dié drukkoker-atmosfeer aan te pas nie. Inteendeel, hy is die mees suksesvolle speler op die veld wat eindstryde betref en het reeds vier wenmedaljes om die nek.
Die enigste werklike groentjie in die Haaie-span is Anton Bresler, wat as plaasvervanger-slot gekies is.
Die 22-jarige het maar drie keer vanjaar as plaasvervanger gespeel en met Ross Skeate én Gerhard Mostert wat nie oorweeg is nie, sal Plumtree hoop Steven Sykes en Alistair Hargreaves kom niks oor nie.
* Die Haaie-span is:
Louis Ludik, Odwa Ndungane, Stefan Terblanche (k), Andries Strauss, Lwazi Mvovo, Patrick Lambie, Charl McLeod, Ryan Kankowski, Willem Alberts, Keegan Daniel, Alistair Hargreaves, Steven Sykes, Jannie du Plessis, Bismarck du Plessis, Tendai (Beast) Mtawarira. PLAASVERVANGERS: Craig Burden, Eugene van Staden, Anton Bresler, Jacques Botes, Rory Kockott, André Pretorius, Riaan Swanepoel.
Bly op hoogte van al die jongste sportnuus deur Nuus24Sport op Twitter te volg.
- Sport24