Steenkamp, De Jongh in beginspan vir Bokke
2012-11-14 12:17
Kaapstad – Gurthrö Steenkamp en Juan de Jongh is albei in Heyneke Meyer se beginspan ingesluit vir die Springbokke se toets teen Skotland.
De Jongh, senter vir die WP, vervang Jaco Taute op buitesenter. Taute skuif na die plaasvervangerbank.
"My plan was nog altyd om vir Juan te laat begin omdat hy die afgelope tyd so goed speel. Ek is regtig opgewonde om te sien wat hy die span kan bied," het Meyer tydens die spanaankondiging gesê.
Steenkamp, wat in sy eerste toets vir die Bokke sal verskyn sedert sy skuif na die Franse klubspan Toulouse, vervang CJ van der Linde op loskopstut.
"Dit is goed om Gurthrö terug in die span te hê; ons wou hom verlede week in die span insluit, maar hy was ongelukkig nie 100% fiks nie," het Meyer gesê.
Van der Linde neem die plek van Pat Cilliers in op die plaasvervangerbank.
Pat Lambie behou ook die nr 10-trui, met Morné Steyn wat op die plaasvervangerbank sal wees.
So lyk die span:
15. Zane Kirchner, 14. JP Pietersen, 13. Juan de Jongh, 12. Jean de Villiers (k), 11. Francois Hougaard, 10. Pat Lambie, 9. Ruan Pienaar, 8. Duane Vermeulen, 7. Willem Alberts, 6. Francois Louw, 5. Juandré Kruger, 4. Eben Etzebeth, 3. Jannie du Plessis, 2. Adriaan Strauss, 1. Gurthrö Steenkamp.
Plaasvervangers: 16 Schalk Brits, 17 Heinke van der Merwe, 18 CJ van der Linde, 19 Flip van der Merwe, 20 Marcel Coetzee, 21 Morné Steyn, 22 Jaco Taute 23. Lwazi Mvovo
Saterdag se afskoptyd in Edinburg is om 16:30.
Vir die jongste sportnuus volg Nuus24Sport op Twitter.
– Sport24
