Springbokke hard aarde toe in 2010
2010-12-21 12:37
Johannesburg - Terug aarde toe.
Dít is die harde werklikheid wat die Springbokke vanjaar beleef het toe die Drienasies- en Britse Leeus-glorie van 2009 opgevolg is deur ’n rugbyjaar wat ondersteuners liefs wil vergeet.
Die afgelope rugbyjaar was juis belangrik, aangesien 2011 ’n Wêreldbeker-jaar is.
Daar is wel diegene, soos die nasionale afrigter, Peter de Villiers, wat meen dat 2010 uiters waardevol was, want die Bokke kon lesse daaruit leer vir 2011.
En lesse het hulle geleer, sommer met ’n paar vuurwarm pakke slae.
De Villiers se Bokke het vyf van hul ses Drienasies-toetse verloor en ook verlede maand teen Skotland vasgeval.
Van hul 14 toetse het hulle slegs agt gewen. Suid-Afrikaners kon darem juig oor die seges oor Engeland, Ierland en ’n verswakte span van Frankryk.
Al probleem is dat Engeland, Ierland en Frankryk waarskynlik nie die spanne is wat tussen Suid-Afrika en ’n derde Wêreldbeker-kroon staan nie.
Wanneer De Villiers weer op die knoppies van spelers wat vanjaar gereeld beseer was kan druk, behoort die Bokke met die spanne van die Noordelike Halfrond af te reken.
Dit was duidelik dat die afwesigheid van Bakkies Botha, Heinrich Brüssow, Juan Smith, Schalk Burger, Fourie du Preez, Jaque Fourie en JP Pietersen ’n leemte gelaat het.
Die Bok-spanlys lyk op vol sterkte steeds vreesaanjaend, maar op grond van 2010 se vertonings nie goed genoeg om die All Blacks te klop nie.
Die Nieu-Seelanders speel teen ’n vinnige tempo en dit is ideaal, gegewe die nuwe toepassing van die reëls by die afbreekpunte.
Kan Suid-Afrika ook teen ’n vinnige tempo speel?
De Villiers-hulle glo duidelik die Bokke moet op hul sterkpunte fokus. Die oorwinnings oor Ierland en Engeland was vanjaar die Suid-Afrikaners se beste vertonings en is met tradisionele “tref en trap”-Bokrugby vermag.
Die Bokke het oor die jare heen hul eie standaard gestel met Wêreldbeker- en Drienasies-titels. Daarvolgens moet Suid-Afrikaners dié span teen die heel beste meet – en dit is Nieu-Seeland.
Ongelukkig was Suid-Afrika in 2010 veel swakker as Nieu-Seeland en die uurglas loop leeg om dié toedrag van sake te verander voor ’n Wêreldbeker-toernooi wat ín Nieu-Seeland gespeel word.
Ondersteuners hoop De Villiers is reg: 2010 was ’n jaar vir lesse leer. Want in 2011 is “skooltyd” verby.
Ervare spelers soos Victor Matfield, John Smit, Smith, Jean de Villiers en Bryan Habana moet natuurlik net soveel skuld kry vir 2010 se gesukkel, want hulle is die spelers wat meesal die lof kry as dit voor die wind gaan.
Dit was ook ’n jaar waarin Smit en Matfield met reg erken is as van die grootstes wat die Bok-trui gedra het, maar ongelukkig het die vonkelwyn soos asyn gesmaak.
’n Paar nuwe sterre het darem ook die Suid-Afrikaanse rugby-hemelruim verlig.
Die vertonings van onder andere Flip van der Merwe, Willem Alberts, Francois Hougaard, Patrick Lambie en Lwazi Mvovo was die silwer randjie om ’n donker wolk en gee ondersteuners hoop.
Die Bokke dra 2010 se brandmerk, maar daar ís nog redes waarom hulle weer die Wêreldbeker kan wen.
- Volg Nuus24 Sport op Twitter.