Springbok-twis eis Botha
2010-09-08 06:31
Pretoria – ’n Nuwe rugbytwis tussen provinsies oor die beskikbaarheid aldan nie van gekontrakteerde Springbokke vir die res van die Curriebeker-seisoen het gister losgebars, en SA Rugby geen keuse gelaat nie as om dié spelers aan die reeks te onttrek.
Dié twis volg nadat die Bok-bestuur op 7 Mei op ’n vergadering met unies ooreengekom het dat al die gekontrakteerde spelers ná die Drienasies-reeks nie in wedstryde sal speel nie.
Spelers soos Bismarck du Plessis en Adrian Jacobs is egter weens beserings nog glad nie vir die Bokke oorweeg nie, hoewel Du Plessis al die afgelope maand of wat vir die Haaie in die Curriebeker-reeks uitgedraf het.
Jacobs het pas weer begin speel.
Bakkies Botha, wat maar twee Super14-wedstryde en drie toetse gespeel het, sou ook ná ’n skorsing van nege weke Saterdag tot die veld terugkeer.
Sport24 kan vandag onthul dat die Westelike Provinsie, Vrystaat en die Haaie erg beswaar aangeteken het teen die insluiting van enige gekontrakteerde Bokke vir dié naweek se Curriebeker-rugby.
Veral Botha se insluiting by die Blou Bulle het die meeste reaksie ontlok.
Die Blou Bulle moes Botha toe onttrek aan die span wat Saterdag in Bloemfontein teen die Vrystaat speel.
Die Bulle se voorspeler-afrigter, Johann van Graan, het gesê Botha is gister meegedeel dat hy nie kan speel nie.
“Bakkies was baie teleurgesteld. Hy het die laaste nege weke baie hard aan sy kondisionering gewerk en was gretig om op die veld te kom.”
Die unie gaan egter nie sy belofte verbreek dat Gurthrö Steenkamp vir die volgende maand aan die Curriebeker-reeks onttrek gaan word nie.
Steenkamp het nie ’n Springbok-kontrak nie, maar het die hele Super14 en in feitlik al die Bok-toetse vanjaar gespeel.
Botha (Blou Bulle), Jacobs (Haaie) en Ricky Januarie (WP) gaan dus nié die volgende paar weke broodnodige wedstrydoefening kry nadat hulle skaars dié seisoen gespeel het nie.Ook CJ van der Linde, wat net vir die Curriebeker-reeks gekontrakteer is, gaan weinig waarde vir die Cheetahs hê.
Dit steek ook ’n ernstige stok in die wiel van die nasionale afrigter, Peter de Villiers, se planne vir die Springbokke se toer na Ierland en die Verenigde Koninkryk.
Die Bokke vertrek op ’n Grand Slam-toer en speel in November toetse teen Ierland, Skotland, Wallis en Engeland én in ’n wedstryd teen die Britse Barbarians.
Die getal wedstryde en minute op die veld wat sekere senior spelers, onder wie John Smit, Victor Matfield, Pierre Spies en Morné Steyn, vanjaar reeds gespeel het, het De Villiers verlede week laat erken dat dié spelers heeltemal te veel rugby gespeel het.
’n Ruskans en waardevolle kondisionering vir hulle is noodsaaklik, maar so ook was speeltyd vir spelers soos Botha, Jacobs, Januarie en selfs Du Plessis en Beast Mtawarira.
Lede in die Bok-bestuurspan is glo erg omgekrap oor dié toedrag van sake.
Die ommeswaai oor sekere spelers en die realiteit dat moeë spelers (soos Steenkamp) mág speel en uitgeruste spelers (Jacobs en Botha) nié, laat die hele kondisioneringsprogram soos ’n grap lyk, word gesê.
Die Bok-bestuurslede is veral ongelukkig omdat hulle geen sê in die verband het nie, maar soos die skuldiges en onbeholpe lyk.
Die groep wat tot 6 Oktober nie sal speel nie, is: Victor Matfield, Danie Rossouw, Bakkies Botha, Wynand Olivier, Morné Steyn, Fourie du Preez, Pierre Spies (almal Blou Bulle), John Smit, Bismarck du Plessis, Tendai Mtawarira, JP Pietersen, Adrian Jacobs (Haaie), Jaque Fourie, Schalk Burger, , Bryan Habana, Ricky Januarie, Andries Bekker (almal Westelike Provinsie), Juan Smith, Heinrich Brüssow en CJ van der Linde (almal Vrystaat-Cheetahs).
Bly op hoogte van al die jongste sportnuus deur Nuus24Sport op Twitter te volg.
– Sport24