Speler-uittog ná WB verwag
2010-09-07 14:09
Kaapstad - Die Suidelike Halfrond kan ‘n reuse uittog van rugbyspelers nà aanstaande jaar se Wêreldbeker-toernooi in Nieu-Seeland verwag.
Na 2007 se Wêreldbeker het ‘n groot aantal spelers van Australië, Nieu-Seeland en Suid-Afrika kontrakte met klubspanne in Europa gesluit vir 'n salaris waarvan hulle by die huis slegs van sou kon droom.
As kaptein van die 2007 Wêreldkampioene, het John Smit skaars die trofee omhoog gehou toe pak hy reeds sy tasse vir Clermont. So ook die losskakel Butch James wat by Bath aangesluit het.
Maar die span van die All Blacks is in 2007 die hardste getref en hulle moes spelers soos Carl Hayman, Chris Jack, Aaron Mauger, Luke McAlister, Sam Tuitupou en Byron Kelleher groet.
Ten spyte van die Nieu-Seelandse Rugbyunie (NZRU) se duidelike belangstelling om Hayman te behou, het dié stut steeds gekies om eerder vir Toulon in die Franse Top14-liga te speel.
Die NZRU se uitvoerende hoof, Steve Tew, het dit duidelik gestel dat die unie nie in ‘n bieëry met klubs van die Noordelike Halfrond betrokke sal raak nie.
In 'n poging om spelers te behou bied die NZRU nou kontrakte aan spelers tot en met 2012.
Volgens die NZRU se algemene bestuurder van professionele rugby, Neil Sorenson, wil hulle nie ‘n herhaling van 2007 sien, toe die helfte van die All Blacks-span hul tasse vir Europa gepak het nie.
“Ons sal bitter graag wil hê dat Richie McCaw, Dan Carter en die nuwe ouens soos Victor Vito en Kieran Read langer by ons bly," het Sorenson bygevoeg.
Bly op hoogte van al die jongste sportnuus deur Nuus24Sport op Twitter te volg.
- AFP