'Sonny Bill moet vleuel speel'
2011-07-06 14:31
Sydney – Die All Blacks moet Sonny Bill Williams op regtervleuel vir die Wêreldbeker kies waar hy 'n soortgelyke impak as Jonah Lomu op die opposisie se verdediging kan maak, meen die voormalige All Black-keurder Earle Kirton.
Daar word tans gedebatteer of dit Williams of Ma'a Nonu moet wees wat vanjaar die nr. 12-trui vir die Nieu-Seelanders moet dra, maar Kirton stel voor die keurders dink verder as die middelveld om sodoende beide spelers te akkomodeer.
"Jy dink dalk dit is van die linkerkant van die veld, maar Williams moet op die regtervleuel oorweeg word," het hy Maandag gesê.
"As jy Sonny Bill het waar hy agter Ma'a Nonu rondhang en die agterlyn dan binnekom, gaan die verdediging nie weet wat om te doen nie."
"Met Jonah Lomu het ons altyd gesê hy het drieë sonder die bal gedruk omdat hy soveel verdedigers na hom getrek het. Ek dink Sonny Bill kan dieselfde effek in die vleul-posisie hê."
"Dan het jy Nonu en SBW om dop te hou en Dan Carter op losskakel met Conrad Smith wat wyd hardloop. Dit sal 'n nagmerrie vir verdedigers wees."
Kirton, wat 'n All Blacks-keurder in 1988 en toe weer vanaf 1992 tot 1995 was, glo Williams sal vinnig aanpas in die nuwe posisie.
Die oud-All Black het vanaf 1963 tot 1970 op losskakel in 13 toetse vir die Kiwi's uitgedraf.
Vir die jongste sportnuus volg Nuus24Sport op Twitter.
– Sport24