Snyman op senter teen Pumas
2011-10-05 08:01
Bloemfontein – Week se rus weens ’n ligte liesbesering het nie teen die binnesenter Philip Snyman getel nie.
Snyman is Dinsdag deur die Vrystaat as een van drie veranderings aan sy beginspan vir Vrydag se Curriebeker-rugbykragmeting met die Pumas in Witbank ingesluit.
Die losskakel Sias Ebersohn en vaskopstut WP Nel vervang, soos verwag, onderskeidelik die beseerde Johan Goosen (harsingskudding) en Coenie Oosthuizen (nek).
Hoewel Snyman nog Donderdag by die kapteinsoefening ’n fiksheidstoets moet slaag, is hy voorlopig in Andries Strauss se plek ingesluit.
Nadat Corné Uys hom by sy Engelse klubspan, die Newcastle Falcons, aangesluit het, het Snyman in Strauss se afwesigheid gewys waarom hy waarskynlik lankal senter moes speel.
Die 24-jarige Snyman moes die afgelope twee jaar danksy ’n oormaat senters en ’n tekort aan vleuels meestal vleuel speel.
Strauss was lank weens ’n enkelbesering buite aksie en moes vanweë Snyman se goeie peil ná sy terugkeer as plaasvervanger tevrede wees. Strauss was teen die Haaie en Westelike Provinsie op die bank en sou aanvanklik Saterdag teen die Leeus ook ’n plaasvervanger gewees het.
Hy is verlede Vrydag eers in die beginspan ingesluit nadat Snyman hom by die kapteinsoefening moes onttrek.
Volgens Naka Drotské, die Vrystaat-afrigter, speel albei senters goeie rugby.
“Daar is min tussen hulle te kies. Andries het Saterdag teen die Leeus goed gespeel. Boonop kom Philip van ’n besering terug en daarom is dit beter om Andries op die bank te hê.
“As Philip seerkry, kan Andries altyd opkom. Maar as Andries begin en Philip moet opkom en kry weer seer, dan het ons ’n probleem,” sê hy.
As Snyman hom wéér onttrek, sal Strauss binnesenter speel en die bank verander. Volgens Drotské sal Philip Burger of die o.21-heelagter Nico Scheepers dan ’n plaasvervanger wees.
Die Pumas-stryd sal ook die eerste keer in langer as ’n maand wees wat die Vrystaat-tweeling, Sias en Robert Ebersohn, saam in die beginspan is. Hulle het laas op 27 Augustus teen die Griekwas saam uitgedraf.
Goosen het die eerste keer teen die Luiperds begin. Sedertdien het Sias hom nog in elke wedstryd vervang.
Intussen is besluit om Oosthuizen, wat Saterdag hier in die gelykop-uitslag van 25-elk teen die Leeus seergekry het, nie dadelik te opereer nie.
Hy sou straks al Dinsdag onder die mes gewees het. Volgens Ian Morris, die Vrystaat-spandokter, sal eers gekyk word hoe die Springbok-stut in die volgende twee weke op behandeling reageer voordat ’n verdere besluit geneem word.
Die Vrystaat-span is:
Hennie Daniller, Rayno Benjamin, Robert Ebersohn, Philip Snyman, Cameron Jacobs, Sias Ebersohn, Pieter van Zyl, Ashley Johnson, Philip van der Walt, Lappies Labuschagné, Izak van der Westhuizen, Francois Uys, WP Nel, Adriaan Strauss (k), Marcel van der Merwe. PLAASVERVANGERS: Hercu Liebenberg, Trevor Nyakane, Wilhelm Steenkamp, Boom Prinsloo, Tewis de Bruyn, Riaan Smit, Andries Strauss.
Pieter Jordaan berig dat die Pumas ’n slotkrisis het en dat hulle die Vrystaat-Cheetahs met die flank JP Mostert as slot aandurf, aangesien drie slotte, Marius Coetzer, Boela Serfontein en Rudi Mathee, nie beskikbaar is nie.
Vir die jongste sportnuus volg Nuus24Sport op Twitter.
– Sport24