Smit vier Bok-dekade
2010-06-23 09:50
Oos-Londen - Dis op die oog af bloot ’n roetine-sege oor Italië wat vandeesweek op die Springbok-rugbyspan wag, maar vir hul kaptein, John Smit, het dié kragmeting spesiale betekenis.
Smit het ’n dekade gelede juis hier sy toetsbuiging vir Suid-Afrika teen Kanada gemaak en hy kon gister sy sentimentele oomblik by die aankondiging van die Bok-span vir Saterdag se tweede toets in die Buffalo City-stadion vergewe word.
“Die herinneringe het teruggekom toe ek Sondag hier aangekom het. Ek is hier onder by die trappe in dié hotel as Bok ontgroen ná my eerste toets. Ek het my eerste lynstaan-ingooi in daardie wedstryd verbrou! Dis moeilik om te glo dat dit al ’n dekade later is,” sê Smit.
Nick Mallett, wat nou Italië se span afrig, het Smit sy toetsbuiging as plaasvervanger laat maak.
Die kaptein wis nietemin niks van die stukkie statistiek dat ’n sege oor Italië sy 50ste oorwinning as kaptein van die Bokke sal wees nie.
Met Victor Matfield wat vandeesweek rus, sal Smit ook die alleenhouer van die rekord vir die meeste toetse vir ’n Bok-voorspeler word. Smit speel Saterdag in sy 96ste toets.
Dis egter nie waar sy fokus vandeesweek is nie. Hy het die naweek se sege van 29-13 met ’n dyspierbesering op sy rusbank dopgehou en hoop om Saterdag aan die spits van ’n beter spanpoging te staan.
“Ons kan die hele week praat oor wat ons wil bereik, maar alles hang af van hoe ons oefen. Gister was goed en vandag nóg beter. Hopelik kan ons daardie ingesteldheid na Saterdag se toets neem,” sê Smit.
Hoe motiveer jy jou om teen ’n span te speel wat jy voor jou siel weet nie in jou liga is nie?
“Die geheim is om nie so daarna te kyk nie,” sê die Bok-kaptein.
“Dis belangrik om net te konsentreer op wat ons goed wil doen en wat verlede week verkeerd was reg te stel. Ons moet eenvoudig in elke afdeling goed vaar.”
Die Bokke se vaskopstut, Jannie du Plessis, meen die span sal baie baat vind by Smit se terugkeer.
“John het die kuns vervolmaak om die span vir ’n groot uitdaging oorgehaal te kry. Hy het sommer onmiddellik ná Maandag se oefensessie sy vinger gelê op wat verkeerd was en wat reggestel moet word,” sê Du Plessis.
“Hy was al vantevore in hierdie situasies en weet waaraan ons moet werk. Dis ’n groot bonus vir die span om hom terug te hê.”
Smit vervang Chiliboy Ralepelle op haker in een van sewe veranderinge aan die span wat die Azzurri in Witbank geklop het.
Andries Bekker begin in Matfield se plek op slot, terwyl Schalk Burger van ’n enkelbesering herstel het en in Dewald Potgieter se plek speel.
Juan de Jongh en Jaque Fourie is die senters in Butch James en Jean de Villiers se plek.
De Villiers skuif regtevleuel toe, met Gio Aplon wat ten koste van Zane Kirchner die nr.15-trui gaan dra.
“Ons wil sien hoe Gio op heelagter vaar, so moet seker maak dat daar ervaring en lengte op die vleuels is om die lewe vir hom makliker te maak,” sê die Bok-breier, Peter de Villiers.
Die Springbok-span is: Gio Aplon, Jean de Villiers, Jaque Fourie, Juan de Jongh, Bryan Habana, Morné Steyn, Ricky Januarie, Pierre Spies, Francois Louw, Schalk Burger, Andries Bekker, Bakkies Botha, Jannie du Plessis, John Smit (k), Gurthrö Steenkamp.
PLAASVERVANGERS: Chiliboy Ralepelle, BJ Botha, Danie Rossouw, Dewald Potgieter, Ruan Pienaar, Butch James, Wynand Olivier.