Slag vir All Blacks voor Ierland-toetsreeks

2012-05-15 07:30

Wellington – Die All Blacks-vleuel Richard Kahui sal weens 'n skouerbesering aanstaande maand se reeks van drie toetse teen Ierland misloop, het die Waikato Chiefs, sy Super-rugbyspan, Dinsdag aangekondig.

Kahui se afwesigheid kan dalk beteken dat Zac Guildford of Hosea Gear sy plek in die span sal inneem. Guildford en Gear is albei weggelaat uit die Nieu-Seelandse oefenspan wat Maandag aangekondig is.

Die 27-jarige Kahui het Sondag die skouerbesering opgedoen in die Chiefs se Super-rugbywedstryd teen die Reds en die span het op hul Twitter-blad aangekondig dat hy nie teen Ierland sal speel nie.

"Richard Kahui sal die All Blacks se toetsreeks in Junie misloop en sal vandeesweek 'n spesialis gaan sien," het die Chiefs geskryf.

Kahui, wat in die All Blacks-span was wat verlede jaar die Wêreldbeker-rugbytoernooi gewen het, het 'n geskiedenis van skouerbeserings, wat hom beperk het tot 17 toetswedstryde sedert sy buiging in 2008.

– Volg Nuus24Sport op Twitter

- AFP