Skotte straks sonder staatmaker-slot
2012-11-06 14:43
Edinburg – Skotland se soeke na 'n eerste oorwinning oor Nieu-Seeland in 107 jaar, wanneer hulle Sondag teen die Wêreldkampioene op Murrayfield uitdraf, is moeiliker gemaak met die nuus dat die talentvolle slot Richie Gray beseer is.
Gray wat vir die Engelse klubspan Sale Sharks speel, sukkel met 'n enkelbesering.
Beserings aan sleutelspelers beteken dat die afrigter, Andy Robinson, nie dieselfde span wat in Junie teen Samoa gewen het, sal kan kies nie.
Vier spelers wat in die toets teen Samoa uitgedraf het is beslis uit.
Die senter Joe Ansbro en skrumskakel Chris Cusiter is weens besering nie beskikbaar nie.
Die agsteman Richie Vernon het nie die aanvanklike toetsgroep gehaal nie en die vaskopstut Euan Murray sal weens godsdienstige redes nie Sondag speel nie.
Skotland kon nog nooit die All Blacks sedert hul eerste ontmoeting in 1905 in Inverleith, Edinburg, klop nie.
Die Skotte se beste vertonings in 28 wedstryde teen die Kiwi's was twee gelykop-uitslae in 1964 en 1983.
Vir die jongste sportnuus volg Nuus24Sport op Twitter.
