Skoolseun sterf ná rugby-duikslag
2013-01-23 15:18
Pietermaritzburg – 'n Skoolseun van Newcastle Hoërskool in KwaZulu-Natal is dood nadat hy vermoedelik sy nek beseer het in 'n wedstryd vir rugbyproewe, het die Witness-koerant Woensdag berig.
Bongukuhle Langa (17), 'n Graad 11-leerder aan die Newcastle Hoërskool, het Maandagmiddag op die rugbyveld gesterf.
Die skoolhoof, Manny Govender, wou nie kommentaar oor die voorval lewer nie.
"Julle sal met die onderwysdepartement moet praat. Hulle het my gevra om alle navrae na hul kantoor te verwys," het hy aan die koerant gesê.
Dave van der Westhuizen, voorsitter van Noordelike KZN Hoërskool rugby, het gesê hy het met die onderwyser gepraat wat 'n beampte by die wedstryd was.
Die onderwyser het gesê Bongukuhle het in 'n duikslag op sy nek geland.
"Volgens hom is dit 'n duikslag wat verkeerd geëindig het en die speler het op sy nek geval," het Van der Westhuizen gesê.
'n Woordvoerder vir die onderwysdepartement, Muzi Mahlambi, het gesê 'n verklaring sal eers uitgereik word wanneer 'n volledige verslag oor die voorval ontvang is.
Lees verder.
- The Witness
– Volg Nuus24 op Twitter.
