Skolerugbyspan in die sop ná drinkery
2010-04-01 08:27
Malani Venter
Stellenbosch - Die o.15-rugbyspan van ’n hoërskool in Johannesburg is aan ’n groot rugbytoernooi in die Paarl onttrek nadat van die spanlede met drank in ’n koshuiskamer betrap is.
Lede van die rugbyspan van die Hoërskool Jeppe, sover bekend die oudste skool in Kensington, Johannesburg, is Maandagaand in die koshuis Werda van die Hoër Jongenskool (Boishaai) met drank betrap.
Die span – wat grotendeels uit gr. 9-leerders bestaan – het deelgeneem aan Boishaai se o.15-toernooi wat verlede Vrydag begin en gister geëindig het. Altesaam 12 skole het aan die toernooi deelgeneem.
Richard Visagie, adjunkhoof van Boishaai, het gister aan Die Burger gesê die koshuisvader het die spelers met drank in ’n kamer betrap en die voorval by die Hoërskool Jeppe se hoof, Anton Dempsey, aangemeld.
“Die hoof was glo briesend en het die span aan die toernooi onttrek. Hulle het die volgende dag na Johannesburg teruggekeer. Die skool sal die nodige tugstappe teen die betrokke leerders doen,” het Visagie gesê.
Hy het bygevoeg dit is ’n duur les wat die leerders geleer het en hy glo Dempsey het reg opgetree.
Dempsey het die voorval aan Die Burger bevestig, ook dat daar wel alkohol betrokke was.
“Daar gaan beslis dissiplinêr teen hulle opgetree word. Die besluit om die seuns aan die toernooi te onttrek, was maklik omdat die skool nie sulke nonsens duld nie,” het Dempsey gesê.
* Dié Gautengse seunskool het al verskeie bekende sportmanne soos James Dalton, gewese Springbok-haker, en Jake White, gewese Bok-breier, opgelewer.
- Sport24