Skok ná Kings-baas bedank

2012-12-11 16:30

Port Elizabeth – Anele Pamba, uitvoerende hoof van die Oostelike Provinsie-rugbyunie (OPRU), het met onmiddellike effek uit sy pos bedank, het die unie Dinsdag in 'n verklaring gesê.

Pamba het sedert 2008 as adjunkpresident van OPRU gedien en het in 2009 ingestem as tydelike uitvoerende hoof van die unie op te tree totdat die Kings in die Superrugby-toernooi toegelaat word.

Cheeky Watson, president van die OPRU, het in 'n mediaverklaring Pamba se bydrae oor die jare geloof.

“Die besluit kom as ‘n skok vir baie van ons en ons gaan Anele se entoesiasme en toewyding mis. Ons kan egter nie keer dat hy ander projekte aanpak nie en ons wens hom sterkte toe met sy toekomstige projekte,” het Watson gesê.

Charl Crous, algemene bestuurder by die OPRU, sal tydelik as die uitvoerende hoof van die unie dien tot 'n geskikte plaasvervanger vir Pamba aangewys word.

Vir die jongste sportnuus volg Nuus24Sport op Twitter.