Sharks-slot skuif na Stade Francais
2011-07-07 15:12
Johannesburg – Die Sharks-slot Gerhard Mostert het Donderdag bevestig dat hy sy rugbyloopbaan vanaf Julie by die Franse klubspan Stade Francais gaan voortsit.
SuperSport.com het in Junie berig dat die WP se Anton van Zyl 'n kontrak met dié flambojante span gesluit het en dat hulle ook na Mostert se handtekening soek.
Maar met Steven Sykes klaar op pad na Ierland, was dit nie duidelik of die Sharks Mostert so vinnig van sy kontrak, wat op 31 Oktober verstryk, sou vrystel nie.
Tog het Mostert se agent, James Adams, bevestig dat sy kliënt 'n "winsgewende" kontrak met Stade Francais gesluit het.
Nog spelers wat vanjaar deur dié Franse klubspan gekontrakteer is, is die Chiefs-haker Aled de Malmanche, die Argentynse losskakel Felipe Contempomi en die All Black-skrumskakel Byron Kelleher.
Vir die jongste sportnuus volg Nuus24Sport op Twitter.
– Sport24