Sharks onttrek; OP teen Stormers in PE
2012-01-05 08:32
Kaapstad – Die voorseisoense program van vier van Suid-Afrika se Superrugby-spanne het ’n onverwagse wending geneem met die Sharks se onttrekking aan die Neo Africa-reeks hier op Nuweland.
Brian van Zyl, uitvoerende hoof van die Sharks, het gister dié span se onttrekking bevestig. Hulle sal deur die Cheetahs in die reeks vervang word.
“Daar was kommer hier dat ons voorseisoense program oorwegend uit wegwedstryde sou bestaan as ons teen die Stormers en Lions in Kaapstad speel,” het Van Zyl gesê.
“Ons voel ook dat ons hekgeld sal kan kry as daar nog ’n wedstryd tuis gespeel word.”
Die Sharks is nou in die proses om ’n vriendskaplike wedstryd op 3 Februarie in hul agterplaas te reël.
’n Teenstander is nog nie vir daardie datum bevestig nie, maar die Sharks speel op 10 Februarie gasheer vir die Boland en het op 17 Februarie in Port Elizabeth ’n verpligtevriendskaplike wedstryd teen die OP-Kings
“Met die res van die program in gedagte, sou dit nie vir ons voordelig wees om nog in die Kaap ook te gaan speel nie,” volgens Van Zyl.
Hy het bygevoeg dat daar nie kontrakbreuk deur die Sharks gepleeg is nie.
“Ons het nooit enigiets onderteken nie en het die Westelike Provinsie betyds ingelig. Die situasie is al in Desember aan hom verduidelik.”
Die president van die Vrystaatse Rugbyunie, Lindsay Mould, het bevestig dat die Cheetahs in dié reeks sal speel.
“Ons afrigtingspan is opgewonde, want hulle kan die wedstryde as proewe aanwend.
“Die Cheetahs sal die Dinsdag (31 Januarie) teen die Lions en die Saterdag (4 Februarie) teen die Stormers speel.”
Die Stormers en Lions skop die toernooi op 27 Januarie af. Al die stryde word op Nuweland beslis.
Ander opwarmwedstryde op die Stormers se program is op 21 Januarie in Wellington teen die Boland en op 11 Februarie in die Baai teen die OP-Kings.
– Sport24
– Vir die jongste sportnuus volg Nuus24Sport op Twitter