Sharks hou voet by stuk
2010-01-23 07:05
Christo Buchner
Johannesburg - Ondanks die toutrekkery oor sy dienste, is die losvoorspeler Willem Alberts in die Sharks se rugbygroep ingesluit vir die driehoekige voorseisoense toernooi teen die Stormers en die Western Force in Kaapstad.
Die Sharks beskou hom nou as een van hulle en steur hulle nie aan die Lions wat nog vasskop en daarop aandring dat hy moet terugkom Goudstad toe nie.
Die KwaZulu-Natallers gaan van die houding uit dat die Suid-Afrikaanse Rugbyunie (Saru) nie jurisdiksie het oor die vriendskaplike wedstryde én Super14-reeks nie en dat dit heeltemal binne hul reg is om Alberts in te span.
Die Sharks neem 28 spelers Kaap toe vir Dinsdag se wedstryd teen die Force en Vrydag s’n teen die Stormers.
’n Oudspanmaat van Alberts by die Leeus, die slot Gerhard Mostert, is ook deel van ’n baie indrukwekkende groep voorspelers.
Agterlangs is die 19-jarige heelagter van die Sharks se o.21-span Patrick Lambie ook gekies. Hy sal as losskakel sy speelkans kry.
Veral voorlangs het die Sharks baie diepte in elke posisie.
Alberts kan as agtsteman én flank oorweeg word, terwyl daar ook nog Ryan Kankowski, Jean Deysel, Jacques Botes en Keegan Daniel is wat die lostrio kan uitmaak.
Mostert sal met die Springbokke Johann Muller en Alistair Hargreaves, asook Steven Sykes, moet meeding om ’n plek in die middel van die skrum.
Geen span in die Super14-reeks kan spog met hakers van die gehalte van Bismarck du Plessis, John Smit en Craig Burden nie. Dit is egter agterlangs waar John Plumtree (hoofafrigter) en sy nuwe regterhand, Hugh Reece-Edwards, vinnig sal moet raakvat.
Die sleutel-posisie van losskakel is ’n kopseer, met Monty Dumond en Lambie die kandidate totdat Ruan Pienaar van sy knie-operasie herstel het.
Steve Meyer daag ook aanstaande week in Durban op, maar Dumond en Lambie sal met flink vertonings in Kaapstad eerste ’n voet in die deur wil kry.
* Die Sharks-groep is: Voorspelers: Willem Alberts, Jacques Botes, Craig Burden, Patric Cilliers, Keegan Daniel, Jean Deysel, Bismarck du Plessis, Jannie du Plessis, Alistair Hargreaves, Ryan Kankowski, Gerhard Mostert, Beast Mtawarira, Johann Muller, John Smit en Steven Sykes. Agterspelers: Monty Dumond, Adrian Jacobs, Rory Kockott, Patrick Lambie, Charl McLeod, Waylon Murray, Lwazi Mvovo, Odwa Ndungane, JP Pietersen, Andries Strauss, Riaan Swanepoel, Stefan Terblanche, Luzuko Vulindlu.
- Beeld