Sharks daag Saru uit
2010-01-29 09:16
Stephen Nell
Kaapstad - Die Sharks het die Suid-Afrikaanse Rugbyunie (Saru) gister wéér uitgedaag deur Willem Alberts in sy beginspan te kies vir vanaand se vriendskaplike kragmeting met die Stormers op Nuweland.
Alberts begin as agtsteman nadat hy sy buiging Dinsdagaand as plaasvervanger teen die Western Force gemaak het.
Dít was ondanks ’n vermaning deur die Suid-Afrikaanse Rugbyunie (Saru) dat dit ’n oortreding van sy regulasies sal wees indien Alberts sonder ’n vrystellingsertifikaat van die Goue Leeus Rugbyunie (GLRU) speel.
’n Klag deur die GLRU beteken die Sharks sal hul besluit aan ’n Saru-tugkomitee moet verduidelik, maar dit het hulle steeds nie gekeer om Alberts vanaand selfs ’n meer prominente rol te gee nie.
Die Stormers sal hulle egter meer bekommer oor die skade wat Alberts as baldraer kan aanrig.
Hy is deel van ’n gedugte pak voorspelers, met die Sharks wat sekerlik gretig sal wees om te vergoed vir Dinsdag se lustelose vertoning in die nederlaag van 0-26 teen die Western Force.
Dit is veral in die skrums waar dinge vuurwarm kan raak, met die Sharks wat John Smit as vaskopstut inspan, met Bismarck en Jannie du Plessis onderskeidelik as haker en loskopstut.
Die Stormers se voorry van Brock Harris, Tiaan Liebenberg en Wicus Blaauw het verlede jaar meer as hul man in die Curriebeker-reeks vir die Westelike Provinsie gestaan, maar vanaand is ’n reuse-toets.
Blaauw is ’n belowende jong loskopstut en dit sal veral interessant wees om te sien hoe hy teen Smit opweeg.
“Ek het nog nie ’n loskopstut gesien wat só aggressief soos Wicus in die skrums is nie. Hy kan een van die groot skrumwerkers op loskop word,” sê die Stormers se voorspeler-afrigter, Matt Proudfoot.
“Wicus se bene is geweldig sterk en hy het ’n breë bors.
“Dit is baie moeilik om hom in toom te hou wanneer hy eers die druk op ’n vaskopstut begin laai.
“Ek glo nietemin John is ’n goeie vaskop. Hy gaan hom nie deur ’n aggressiewe loskop van stryk laat bring nie. Jy moet korrek teen hom skrum én aggressief wees.
“Dit gaan vir ons ’n groot uitdaging voorlangs wees, want ons ding van nou af nie net met die beste in Suid-Afrika mee nie, maar met die beste ter wêreld,” sê Proudfoot.
Dit sal ook interessant wees om te sien wat die Argentynse stut Eusebio Guinazu die Stormers kan bied. Hy kan aan albei kante van die skrum aangewend word.
Harris en JC Kritzinger bied goeie vaskop-moontlikhede, maar die uitmergelende aard van die Super14-reeks maak dit belangrik om ’n derde vaskop-opsie iewers te vind.
Die Sharks sal vir die vrot vertoning teen die Force wil vergoed en sal voorlangs met die regrukpoging wil begin.
Die Stormers moet weer wys dat verlede week se groot sege oor die Force wel op groot belofte vir die nuwe seisoen dui.
Die spanne is:
Stormers: Joe Pietersen, Gio Aplon, Jaque Fourie, Juan de Jongh, Bryan Habana, Peter Grant, Dewaldt Duvenage, Duane Vermeulen, Francois Louw, Schalk Burger (k), Andries Bekker, De Kock Steenkamp, Brock Harris, Tiaan Liebenberg, Wicus Blaauw.
Plaasvervangers: Deon Fourie, JC Kritzinger, Eusebio Guinazu, Anton van Zyl, Pieter Louw, Bolla Conradie, Lionel Cronjé, Sireli Naqelevuki, Frikkie Welsh, Fabian Juries.
Sharks: Patrick Lambie, Odwa Ndungane, Waylon Murray, Andries Strauss, JP Pietersen, Monty Dumond, Rory Kockott, Willem Alberts, Jean Deysel, Keegan Daniel, Johann Muller, Gerhard Mostert, John Smit (k), Bismarck du Plessis, Jannie du Plessis.
Plaasvervangers: Craig Burden, Tendai Mtawarira, Steven Sykes, Ryan Kankowski, Charl McLeod, Riaan Swanepoel, Stefan Terblanche, Patric Cilliers, Alistair Hargreaves, Steve Meyer, Luzuko Vulindlu, Lwazi Mvovo.
Skeidsregter: Craig Joubert.
TV: 19:00 op SS 1.
- Beeld