Seuns 'weggeraap' vir Blou Bul-rugby
2011-02-27 07:14
Kaapstad - Bolandse skoolhoofde en rugby-amptenare is ontstoke oor die Blou Bulle hul beste kalwers na spogskole in Pretoria lok deur vet kontrakte voor hul voete te gooi.
Een Stellenbosse skoolhoof wat pas onder so ’n “strooptog” deurgeloop het, sê dié praktyk grens aan “kinderhandel”.
Altesame 17 jong, bruin spelers is aangekeer deur Xander Janse van Rensburg, die Blou Bulle se werwingsbeampte.
Dié belowende spelers kom van Paul Roos Gimnasium (Stellenbosch), die hoërskole Schoonspruit en Swartland (albei in Malmesbury) en Dirkie Uys (Moorreesburg).
Van dié spelers, wat tussen 15 en 17 jaar oud is, was deel van die Boland-rugbyunie se Elite-ontwikkelingsprogram waaraan derduisende rande bestee word. Die spelers is nou ingeskryf by die hoërskole Waterkloof (3), Garsfontein (9), Centurion (3) en Menlopark (2).
Al vier dié skole is deel van die Blou Bulle se rugbyontwikkelingsprogram.
Duncan Matthews van die Hoërskool Swartland was lid van die SA Elite-ontwikkelingspan en is nou by die Hoërskool Waterkloof ingeskryf. Hy en sy ma, Anthea Fluks, het ’n ontwikkelingsooreenkoms (vir junior-spelers) met die Blou Bulle gesluit.
Duncan ontvang onder meer sakgeld van R12 000 per jaar en gratis raad en bystand met siektes en beserings.
“Daar is geen logiese rede om seuns uit hul ouerhuis te neem en hulle na skole in Gauteng te stuur nie,” sê Jannie van der Westhuizen, rektor van Paul Roos Gimnasium.
“Die wyse waarop dit gedoen word, is ook oneties, onopvoedkundig, en grens na my mening aan kinderhandel.
“Goeie verhoudinge tussen skole gaan ernstig in die gedrang kom.”
Dirk Marais, hoof van die Hoërskool Swartland in Malmesbury, is ewe ontsteld. “Nog nooit het ons op so ’n groot skaal spelers afgestaan nie.
“Die Blou Bulle en die ouers het ons nooit hieroor ingelig nie.
“My skool het goeie sportbeurse aan seuns uit arm omgewings gegee. Nou is hulle weggeraap. Beleggingsgeld is daarmee heen, die gemeenskap verloor ’n kind, gesinne word opgebreek.
“’n Speler wat dit nie in die Noorde maak nie, kom later terug na dieselfde skool en unie wat hy tevore in die tande geskop het?”
Denver Pienaar, die Boland-rugbyunie se bestuurder van spelontwikkeling, sê dis hartseer dat die unie én skole met baie sweet in die spelers belê, net om hulle te verloor. “Die Hoërskool Swartland het sowat R25 000 in die speler met die Blou Bulle-kontrak belê.
“Wat doen die Blou Bulle met SA Rugby se ontwikkelingsgeld?”
Volgens Theo Kleynhans, die WP-rugbyvoetbalunie se hoofbestuurder van jeugrugby, is dit “baie erg dat op maatskappyvlak fisieke kontrakte gegee word vir jong spelers uit ander provinsies”.
Ian Schwartz, die Blou Bulle se bestuurder van hoë prestasie, het op die bewerings gereageer:
“Ons neem talentvolle spelers uit veral arm gebiede in ons stelsel in en stel hulle aan die beste ontwikkeling bloot.
“Ons het ons oë oor die hele land.
“Almal in die land doen dit tog?
“In die Boland gaan sulke spelers na Paul Roos Gimnasium en Hoër Jongenskool in die Paarl.
“Spelers word by ons in goeie skole geplaas en as hulle goed is, word hulle deel van die Elite-span.
“Op ouderdom 18 kan hy ’n kontrak met die Blou Bulle sluit.”
Danny Pietersen, ’n skoolhoof in Atlantis, is deur die Blou Bulle genader om talentvolle spelers daar te identifiseer.
“Ek doen dit gratis. Dié kinders uit Atlantis, Malmesbury, Mamre en Pella is arm en kry daardie één kans in die lewe. Dis om kosteloos by ’n goeie skool te wees en later dalk ’n goeie kontrak. Dis ’n groot tree na ’n beter lewe.”
Uittreksels van Danny Pieterse se spelersverslag aan die Blou Bulle en Pretoriase skole:
- “Vir hierdie speler sal julle maar moet veg; hy is die moeite werd en hoe vinniger ons hom hier kan kry hoe beter.”
- “Is ’n voorry en is ongelooflik groot vir sy ouderdom (gr. 8-leerling). Kan special wees met regte afrigting.”
- “Hierdie is twee boeties en net bereid om Waterkloof toe te skuif.”
- “Die skool wat hom gaanopraap, gaan ’n ware ster kry.”
- “Losskakel (gebore 1995). Hy en (speler se naam) is die skakelpaar al vir nege jaar. Moet as kombinasie skuif.”
- Rapport