Ses nuwe Bokke toer na Europa
2010-10-31 10:53
Johannesburg - Die Springbok-keurders het gisteraand ses nuwelinge ingesluit in die
Bokke se groep vir hul Grand Slam-toer na Ierland en Brittanje.
Hulle
is die Haaie se nuwe losskakel-sensasie Patrick Lambie, die Leeus se
ewe talentvolle nr. 10, Elton Jantjies, die Durbanse spog-vleuel Lwazi
Mvovo, die Haaie se yster-losvoorspelers Willem Alberts en Keegan
Daniel, asook die Vrystaat se jong krag-stut Coenie Oosthuizen.
Peter
de Villiers en sy troepe vertrek Woensdagaand na Dublin waar hulle
Saterdag in die eerste van vyf toetse met Ierland kragte meet.
Daarna wag Wallis, Skotland, Engeland en die Britse Barbarians op agtereenvolgende naweke op Suid-Afrika se rugbytrots.
De
Villiers en sy twee hulpafrigter, Dick Muir en Gary Gold, is onder
kwaai druk om die Springbokke weer op die wenpad te kry ná ’n
katastrofiese Drienasies-reeks waarin die Bokke net een van ses toetse
kon wen.
Lambie, Jantjies, Mvovo en Alberts se insluitings in die
Bokke se toergroep is geen verrassing nie, maar dié van Daniel en
Oosthuizen kan dalk in sommige kringe die wenkbroue laat lig.
Die twee nuwe Bokke het egter vanjaar met goeie spel beïndruk en is beslis welverdiend in die Bok-groep opgeneem.
Bly op hoogte van al die jongste sportnuus deur Nuus24Sport op Twitter te volg.
- Sport24