Sege 'weeg swaarder as Stefan-swanesang'
2011-10-29 08:05
Johannesburg – Die Haaie het nie tyd vir tierlantyntjies in vandag se Curriebeker-eindstryd teen die Goue Leeus nie, daarom word daar nie ’n ophef gemaak daaroor dat dit dalk Stefan Terblanche se laaste rugbywedstryd vir die Durbaniete kan wees nie.
Terblanche was langer as ’n dekade een van die Haaie se grootste staatmakers en die speler wat die swart en wit-trui die meeste oor sy kop getrek het.
Maar die Haaie se afrigter, John Plumtree, het gesê hy gaan dit nie aan die groot klok hang dat dit dalk Terblanche se laaste wedstryd is nie – en dit is ook nie ’n geval dat die spelers die eindstryd hier op Coca-Colapark vir Terblanche wil wen nie.
“Nee wat, vir tierlantyntjies het ons nie tyd nie.
“Ons fokus as ’n span bloot daarop om die Beker te wen.
“Daar is genoeg om op te fokus in só ’n eindstryd sonder dat ons allerhande ander dinge bysleep,” het Plumtree gesê.
“Die spelers moet reg ingestel wees, want só ’n eindstryd gaan juis baie daaroor of jou kop reg is of nie.
“Daarom moet jy gefokus wees op dit wat gedoen moet word om ’n oorwinning te verseker,” het hy gister gesê.
Terblanche het nog nie finaal besluit of hy sy stewels gaan ophang ná hierdie seisoen nie – maar dié veteraan sê óók die span se fokus moet net op die eindstryd wees.
Wynand Claassen, ’n voormalige Natal-kaptein wat ook die Springbokke aangevoer het, glo dit gaan ’n “blêddie goeie eindstryd wees. Hoe kies jy ’n wenner tussen hierdie twee spanne?” wou hy weet.
“Aan die een kant het jy ’n relatief onervare span sonder werklike sterre wat baie rugby speel.
“En aan die ander kant het jy die gevestigde span met die groot name.
“In hierdie geval glo ek nie die groot name op papier sê te veel nie.
“Ons was in die eindstryd van 1984 teen die WP in die Kaap in amper dieselfde posisie as die Leeus.
“Die WP het omtrent die hele Springbok-agttal gehad – en ons is geen kans gegee om te wen nie. Rustyd was ons nog voor en ons het toe eindelik net met 9-19 verloor.
“In ’n eindstryd gaan dit oor jou ingesteldheid.
“Dit is nou ’n wedstryd wat tussen die ore beslis word.
“Dit is ook fassinerend om die afrigtingstyle van die twee Nieu-Seelanders (Plumtree en John Mitchell) te sien en die hardlooplyne wat hulle by hul spanne gevestig het.
“Ek dink dit gaan ’n uitstekende eindstryd wees.
“En hierdie is een waarna ek geweldig baie uitsien,” het Claassen gesê.
– Vir die jongste sportnuus volg Nuus24Sport op Twitter.
– Sport24