Seer lywe sal Leeus nie keer
2011-10-24 09:34
Johannesburg – Terwyl Josh Strauss Sondag sy “silwer”-verjaardag gevier het, sal die partytjie nie vir hom begin voordat die Goue Beker in Coca-Colapark se trofeekas staan nie.
Strauss se 25ste lewensjaar kon kwalik beter begin het, want dié Leeus-tropleier gaan sy span Saterdag teen die Haaie in die Curriebeker-eindstryd aanvoer, minder as 17 maande nadat hy hom as ’n relatiewe onbekende speler by die Leeus aangesluit het.
Sy gewildheid het byna net so vinnig toegeneem soos wat sy baard gegroei het – en kunsbaarde raak ook al hoe gewilder by die ondersteuners.
Die Leeus se kans om hul knap vertoning teen die Westelike Provinsie teen Keegan Daniel se Haaie te herhaal, sal wel ook in ’n mate afhang van hoe Strauss-hulle fisiek herstel ná nóg ’n klipharde kragmeting.
Tog sê Strauss die kans is klein dat pyne en skete hul geesdrif vandeesweek sal demp.
“Hierdie is die grote,” het Strauss oor die eindstryd gesê.
“Wat die komende naweek gebeur, gaan ’n bewys wees van die harde werk wat ons vanjaar ingesit het.
“Daarom dink ek dit gaan nie saak maak hoe ons lywe in die week wat voorlê voel nie.
“Ons gaan maar eers vergeet van die houe wat ons gevat het, want hierdie is die grootste verhoog waarop sommige van ons ooit sal speel.”
John Mitchell, afrigter van die Leeus, het ná die Rooibontes se halfeindstryd-sege van 29-20 oor die Westelike Provinsie gesê sy spelers het, benewens ’n paar stampe, nie ernstige beserings nie.
“Ons hou almal ’n hele ruk al met pleisters aanmekaar. Ek dink almal sal reg wees,” het Mitchell gesê.
Die staatmaker-vleuel Deon van Rensburg is die enigste Leeu wat die veld vroeërig weens ’n ligte besering verlaat het.
Mitchell se besluit om verskeie van sy sleutelspelers verlede naweek ’n ruskans teen die Haaie in Durban te gee, was nog ’n meesterskuif deur dié Kiwi. Die Leeus was toe reeds van ’n halfeindstryd op hul tuisveld verseker.
Nou sal die Haaie van hul groot sege van 53-9 oor die Leeus moet vergeet, want ná die Leeus se sege oor die WP is dit duidelik daar kan nie veel in die uitslag in Durban gelees word nie.
“Die ouens het hulself gelig. Ons het geweet dit (die halfeindstryd) is basies ’n ander reeks,” het Strauss gesê.
“Teen die Haaie (verlede naweek) was die ligafase vir ons verby. Maar dié keer het ons geweet wat ons moes doen en daarby gehou.”
Vir die jongste sportnuus volg Nuus24Sport op Twitter.
– Sport24