Schalk, Adi voor uitdaging
2009-08-04 08:28
Kaapstad. - Schalk Burger en Adi Jacobs sal moet baklei om hul plekke in die Springbokke se beginspan te herwin.
Die Springbok-afrigter, Peter de Villiers, het gister gesê hef aan lê voor vir die ysterflank Burger en vlugvoetige senter Jacobs om die uitsoek-vyftiental weer te haal ná die goeie spel van Heinrich Brüssow en Jaque Fourie die laaste weke.
Brüssow het die geskorste Burger se skoene met groot welslae teen die All Blacks vol gestaan, terwyl Fourie met ewe veel sukses die beseerde Jacobs se plek in die Bokke se middelveld teen die Nieu-Seelanders geneem het.
De Villiers het bevestig dat die magsbalans van Bok-rugby versteur is.
“Daar lê vir die manne wat voorheen daar was, ’n groot uitdaging voor,” het hy gesê toe hy oor Brüssow se impak uitgevra is.
“Selfs ’n ou soos Adrian Jacobs, wat voorheen voor in die ry was, gaan nou sukkel om sy plek terug te kry. Dis goed om te weet ons tweede linie kan nét so goed vaar wanneer hulle die verantwoordelikheid gegee word,” sê De Villiers oor sy eerstekeuse-spelers wat die toetse teen die All Blacks misgeloop het.
Die veelsydige Bok-agterspeler Ruan Pienaar is ook weer reg nadat hy die naweek se sege van 31-19 oor Nieu-Seeland in Durban weens ’n enkelbesering misgeloop het.
Dis egter moeilik om te sien hoe Morné Steyn as losskakel gepos kan word ná sy punterekord teen die Kiwi’s.
Burger het sy Bok-spanmaats gister gehelp met ’n afrigtingskliniek wat die Springbokke in die Boland-stadion in Wellington gehou het.
Sy skorsing verstryk op 22 Augustus en hy sal vir Suid-Afrika se oorsese Drienasies-wedstryde teen Australië en Nieu-Seeland beskikbaar wees.
Maar Brüssow het in Burger se afwesigheid besonder goed gevaar teen die Britse en Ierse Leeus én teen die All Blacks se kaptein, Richie McCaw, sy man gestaan.
Fourie het ook die laaste weke sy waarde onderstreep. Hy het ’n kritieke drie in Suid-Afrika se terugvegpoging in die tweede toets teen die Leeus gedruk, en het Saterdag teen die All Blacks sterk vertoon.
De Villiers het ook bevestig daar is geen beserings in die Bok-kamp nie ná die sege oor die All Blacks.
Dit is goeie nuus vir die Bokke, wat beswaarlik vir ’n beter begin tot hul Drienasies-veldtog kon gevra het as die twee tuisseges oor Nieu-Seeland.
Maar die Wallabies sal Saterdag op Nuweland ’n nuwe uitdaging bied.
“Hulle is baie meer gestruktureerd en hou jou langer besig. Daar word langer deur fases gespeel en hulle dwing jou om onkant te gaan. Hulle het ook goeie skoppers,” sê die Bok-breier.
“Dit sal anders wees as teen die All Blacks, maar ons sal konsentreer op wat ons goed doen.”
Die Wallabies sal sonder twyfel ook beter in die lynstane vaar teen die Bokke as wat die All Blacks vertoon het.
“Hulle skenk meer aandag aan detail in die lynstane, maar is meer negatief as die All Blacks in die skrums. As Australië nie daar die oorhand kry nie, sal hulle grond toe gaan in ’n poging om ’n strafskop te melk.”
De Villiers het bygevoeg dat die Bulls-losskakel Steyn nog heelwat beter kan speel, ondanks sy puik poging teen die All Blacks.
“Morné kan sy lyn vinniger wegkry en meer spasie skep.
“Hy het ’n briljante skopvoet, maar is nog nie ’n volmaakte speler nie. Daar is nog ruimte vir verbetering.”
De Villiers voel ook só oor die Bok-span se vertoning in sy geheel, maar kla nie oor wat die Bokke tans onder sy leiding vermag nie.
“Ons streef na perfeksionisme en goeie besluitneming.
“Die doelwit is om te wen – solank ons dít goed genoeg doen, is dit heeltemal aanvaarbaar,” sê hy.
–Sport24