Sarel vroeër op pad na Waratahs
2011-10-12 09:05
Die derby Saterdag in die Vrystaat-stadion is allig Sarel Pretorius se laaste rugbywedstryd vir die Poubloues.
Dié woelige skrumskakel se volgende verskyning op dié veld sal in die gewaad van die Waratahs wees.
Ná 2012 se Super Rugby-reeks sal die Vrystaat-stadion sy nuwe tuiste word, want hy gaan aanstaande jaar vir die Vrystaat in die Curriebeker-reeks beskikbaar wees.
Dit alles sal Saterdag hier deur sy gedagtes maal wanneer Griekwas die Vrystaat in ’n belangrike Curriebeker-wedstryd in vanjaar se reeks pak.
Griekwas het ’n bitter skrale kans om nog by die agterdeur in te glip, terwyl die tuisspan ’n tuishalfeindstryd in sy visier het.
Pretorius sê hulle is nie veel gepla oor die punteleer nie, maar hulle wil die reeks goed eindig.
“Dit is die laaste seisoen vir ’n paar van ons soos ek en Riaan (Viljoen) by Griekwas.
“Ons sal graag op ’n hoë nooit wil eindig,” sê Pretorius.
Viljoen, eintlik heelagter, was losskakel met Griekwas se laaste klompie wedstryde. Dié veelsydige agterspeler verhuis eersdaags na Durban.
Dié twee sterre van Griekwas het hul tuisskare verlede week gepas gegroet met ’n sege oor die gedugte Bulle. Dit was ’n goeie afskeidgeskenk en hulle wil nou ook met ’n sege totsiens sê.
Pretorius groet einde vandeesmaand sy vriende en familie om hom by die Waratahs vir die Super Rugbyreeks aan te sluit.
Super Sarel vlieg reeds op 27 Oktober na Sydney.
Sy eerste doelwit in Australië sal wees om so gou as moontlik in te skakel en hom spoedig te probeer vestig.
“Hulle het juis gevra ek moet probeer om bietjie vroeër soontoe te gaan om almal te leer ken en om so gou moontlik by hulle stelsels in te val.”
Pretorius sal met Kersfees en Nuwejaar vir ’n paar dae terug by die huis wees.
Hy sien geweldig uit na die uitdaging wat in Australië op hom wag. Hy is bereidwillig om te gaan leer en skerts dat die Aussies ook van hom kan leer.
Ofskoon hy vanjaar, ná ’n uitstekende Super Rugbyreeks vir die Cheetahs, oor die hoof gesien is, droom Pretorius steeds daarvan om eendag vir sy land te speel.
“Dit is maar van kleintyd af ’n ou se droom om eendag vir die Springbokke te speel.”
Hy glo sy spel kan by sy Waratahs-besoek baat vind.
Die Waratahs speel volgende jaar op 26 Mei in die Vrystaat-stadion teen die Cheetahs.
– Vir die jongste sportnuus volg Nuus24Sport op Twitter.
- Volksblad