SUT is Varsityskild-kampioene
2011-04-04 22:00
Johannesburg – Die span van FNB Sentrale Universiteit van Tegnologie (SUT) in Bloemfontein het die eerste span geword om die Varsityskild te lig toe hulle FNB Wits met 25-18 geklop het in ‘n taai eindstryd in Johannesburg.
Die span van Bloemfontein het eerste toegeslaan toe hulle ruimte aan die buitekant geskep en die regtervleuel Alec Mhlanga deurgestuur het vir ‘n drie ná slegs drie minute.
Wits het egter kort daarna gedruk, met die kaptein en skrumskakel, David Turnbull, wat ná ‘n hanteerfout deur SUT deurgebars en uitgegee het na sy losskakel, Greg Blom. Blom het die bal wyd gestuur na die slot Charles Baggott, wat in die hoekie gedruk het.
Jaco Oosthuizen, SUT-senter, kon kort daarna skaars sy geluk glo toe hy ‘n aangee op Wits se doellyn onderskep en oorgeduik het.
Die rustydtelling was 20-11 in SUT se guns.
Wits het egter ná die rustyd met nuwe doelmatigheid gespeel en is beloon met ‘n drie deur die regtervleuel Riaan Arends ná ‘n uitstekende dartellopie.
Die besoekers het egter daarin geslaag om weer te gaan druk toe Mhlanga, wat die man van die wedstryd-toekenning ontvang het, in die hoekie gedruk het.
Dit het die telling tot op 25-18 gebring en SUT kon vir die laaste tien minute aan dié voorsprong vasklou en die trofee lig.
Die Varsitybeker-eindstryd word volgende Maandag tussen Tuks en UK in Pretoria gespeel.
- Vir die jongste sportnuus, volg Nuus24Sport op Twitter
- SAPA