SA’er terug by Sharks
2010-01-21 19:57
Perpignan, Frankryk - Die Franse rugbyklub Perpignan het bevestig dat hul losskakel, Steve Meyer, dié klub wel gaan verlaat om vir die Sharks te speel.
Die 25-jarige Suid-Afrikaner het die Sharks in 2006 verlaat om in Frankryk vir Perpignan te speel maar is sedert sy tyd daar, gereeld deur beserings gekwel.
“Steve het niks anders as slegte geluk met een besering na die ander by ons gehad nie,” het Paul Goze, dié klub se president, gesê.
“Tog het hy nog altyd net sy beste gelewer en ons sal nie in die pad van sy loopbaan staan nie,” het Goze gesê.
Meyer sal hom volgende week by die Sharks in Durban aansluit.
- Sapa