SA vroueskeidsregter maak geskiedenis

2013-02-26 17:45

Johannesburg – André  Watson, grootbaas van die Suid-Afrikaanse Rugby-skeidsregtersvereniging, het die skeidsregter Marlize Jordaan geprys nadat sy die naweek geskiedenis gemaak het deur die eerste vrou te word wat ‘n internasionale seweswedstryd vir mans geblaas het.

“Dit is nie baie algemeen vir vroue om as skeidsregter op te tree in manswedstryde nie, maar Marlize het so baie in haar loopbaan gegroei dat ons glad nie verras was oor haar aanstelling nie,” het Watson Dinsdag gesê.

“Verlede week was sy die skeidsregter by die o.20 Varsitybeker-wedstryd tussen Kovsies en UP-Tuks, en sy was baie goed.”

“In 2012 het sy ook twee wedstryde in die o.19B Absa-toernooi met goeie selfvertroue hanteer. Ons verwag groot dinge van haar en is baie trots op haar prestasies.”

Jordaan was Sondag die skeidsregter in die wedstryd tussen Peru en Paraguay by die Consur-sewestoernooi in Rio de Janeiro.

– Volg Nuus24 op Twitter
 

- SAPA