‘SA rugby nog te wit’
2011-08-07 08:59
Johannesburg – ’n Rasseherrie dreig weer in Suid-Afrikaanse rugby.
Oregan Hoskins, Suid-Afrika se rugbybaas, het gister gesê hy is “hoogs ontevrede” omdat die spanne wat in die Curriebeker-kompetisie en die nasionale o.19- en o.21-reekse speel, steeds leliewit is – en dít nadat hy reeds drie weke gelede die onderskeie provinsiale unies in ’n brief daaroor aangespreek het.
Hoskins se ontevredenheid volg op berigte die afgelope week dat sekere klubs in die Westelike Provinsie ook ongelukkig is omdat van dié unie se spanne “te wit” is. Boonop is die Suid-Afrikaanse Rugbyunie (Saru) Dinsdag in die parlement oor transformasie geroskam.
Hoskins het aan Rapport gesê hy is bitter ongelukkig oor die huidige stand van sake wat transformasie in rugby betref.
“Dis onaanvaarbaar dat sekere unies nog leliewit spanne kies. Saru is verbind tot transformasie, maar nie al die unies bring hul kant nie,” het die spel se grootbaas gesê.
Hoskins het aan Rapport bevestig dat hy reeds drie weke gelede ’n brief aan al 14 die provinsiale unies gestuur het waarin hy die kwessie aangeroer het.
In September verlede jaar het Hoskins ook die unies oor transformasie vermaan nadat Louis von Zeuner, adjunk- uitvoerende hoof van Absa, in ’n SMS aan die rugbybaas sy kommer oor die gebrek aan verteenwoordiging in die onderskeie Curriebeker-spanne uitgespreek het.
Dít het ’n reuse-herrie landwyd tot gevolg gehad en die burgerregte-organisasie AfriForum het ’n veldtog teen Absa begin wat daartoe gelei het dat duisende Absa-kliënte gedreig het om hul rekeninge te sluit.
Von Zeuner het destyds ontken dat hy met dié SMS aan Hoskins voorgeskryf het dat ’n kwotastelsel in rugby gevolg moet word.
Hy het gesê Absa se standpunt is dat spelers wat die potensiaal toon, die kans gegun moet word om te ontwikkel en hul talent ten toon te stel.
Hoskins se brief verlede maand aan die unies kom nadat die Haaie geen gekleurde spelers in hul span gehad het vir hul Curriebeker-kragmeting teen die Blou Bulle nie.
Die Cheetahs het dieselfde naweek net een gekleurde speler in hul span gehad toe hulle teen die Luiperds gespeel het.
“Net 17% van die spelers wat daardie naweek in die onderskeie provinsiale kompetisies gespeel het, was gekleurde spelers. Dit is te min en ons moet daarop verbeter,” sê Hoskins.
Hoewel daar geen amptelike kwotastelsel meer in rugby is nie, het Hoskins aan Rapport gesê hy is oortuig dat die regering dit gaan herinstel as die unies voortgaan om so min gekleurde spelers te kies.
Die unies word in sekere kringe daarvan beskuldig dat hulle slegs ’n handvol gekleurde spelers kontrakteer en dat dié spelers nie “vervang” word as hulle beseer of by die Springbokke betrek word nie.
Wat die Springbok-span betref, het Hoskins gesê hy is tevrede met die samestelling nadat die afrigter, Peter de Villiers, ses gekleurde spelers in die groep van 24 ingesluit het.
– Vir die jongste sportnuus volg Nuus24Sport op Twitter.
- Rapport