Ruan bly tot 2014 by Ulster
2012-01-13 09:45
Bloemfontein – Hy word soos ’n familielid in Belfast behandel en dit was vir Ruan Pienaar ’n maklike besluit om sy kontrak met Ulster te verleng.
Dié 27-jarige veelsydige Springbok-skrumskakel is nou tot einde 2014 vir sy Ierse rugbyklub beskikbaar nadat hy hom in 2010 van die Sharks af by Ulster aangesluit het.
Hy, Fourie du Preez (Suntory Sungoliath), Michael Claassens (Bath) en Neil de Kock (Saracens) is van die Bok-skrumskakels wat hul rugby oorsee speel.
“Hy geniet die klub en die mense in Belfast baie. Hy het goeie vriende daar, onder andere Johann Muller en sy gesin met wie hy al jare lank bevriend is,” het Gerrie Swart, agent van Pienaar, gesê.
Muller is kaptein van ’n Ulster-span wat wemel van Suid-Afrikaanse spelers wat ook die agtsteman Pedrie Wannenburg, die senter Stefan Terblanche en die losvoorspeler Robbie Diack insluit.
Swart het gesê Ulster se uitvoerende hoof, David Humphreys, is ’n jong dinamiese administrateur wat as ’n voormalige toetsspeler baie goed met Pienaar werk en mooi na al sy belange omsien.
“Hy verstaan beroepsrugby vanuit sy ondervinding as ’n speler en het ’n eerlike verhouding met Ruan.
Dit bring mee dat Ruan presies weet wat sy rol in die span nou en oor die volgende twee jaar sal wees.
“Gevolglik het Ruan gemoedsrus oor sy loopbaan en kan hy fokus op die verwagtinge wat die klub van hom koester in ’n stabiele, deursigtige professionele werkplek,” het Swart gesê.
Pienaar, wat die Bokke in 51 toetse verteenwoordig het, vaar goed in Europese toestande en is in 2010 as Ulster se Speler van die Jaar aangewys.
Hy is dieselfde jaar ook as die Magnersliga se Speler van die Jaar bekroon.
“Ek het my eerste twee seisoene hier (in Belfast) baie geniet en goeie vriende gemaak. Die mense in Belfast het my en my gesin met ope arms verwelkom – dit het my besluit vergemaklik,” het Pienaar op sy klub se webwerf gesê.
Vanweë ’n nuwe beleid in Ierse rugby mag Pienaar se kontrak nie ná 2014 verleng word nie en kan dit meebring dat die oud-Vrystater sy loopbaan dan in Suid-Afrika sal kom afsluit.
– Vir die jongste sportnuus volg Nuus24Sport op Twitter.
– Sport24
