Reëls dalk turksvy vir Hane
2010-06-12 11:15
Die Burger
Kaapstad - Benewens die Springbokke, het die Franse rugbyspan vandag op Nuweland ook die nuwe toepassing van sommige reëls om te oorkom.
In die eerste klompie weke van die Super14-reeks is daar gespook om veral by die afbreekpunte sommige baljagterinstinkte af te leer.
Die kort tyd waarin die Hane dít moet baasraak, sal sommige Bok-ondersteuners laat dink dis 1-0 vir Suid-Afrika voor die afskop.
Maar die Hane se kaptein, Thierry Dusautoir, verskil: “Dit gaan moeiliker wees. Maar wanneer daar in die verlede nuwe reëls in ons plaaslike kompetisie ingestel is, het dit so drie of vier oefeninge geneem om daarby aan te pas.
“Ek glo ons sal slim genoeg wees om nie te veel punte daar (in die losskrums) af te staan nie.”
Die Franse het al gewys hulle kan die Bokke fisiek aanvat en selfs oordonder.
Dit is dalk juis oor die bykomende faktor dat hul breier, Marc Lievremont, vroeër vandeesweek gesê het die stryd tussen die losvoorspelers gaan deurslaggewend wees.
Voeg die Nieu-Seelandse blaser Bryce Lawrence in die drukkoker en die Hane kan hul vingers verbrand indien hulle nie betyds met die nuwe toepassing van die reëls gekonfyt raak nie.
“Ek sal ’n bietjie aan my speelstyl moet verander, maar ek sal my bes probeer,” het Dusautoir hieroor gesê. Of “probeer” teen spelers soos Francois Louw en Schalk Burger genoeg gaan wees, is te betwyfel.
Maar dalk sukkel dié Fransman net om hom lekker in Engels uit te druk, want hy het dit met die onheilspellende grynslag van ’n skerpskutter gesê.
Dusautoir het bygevoeg dat die belangrikheid van skrums en lynstane in die uitslag van ’n wedstryd nie uit die oog verloor moet word nie.
Einde verlede jaar kon hulle die skrumboksie met ’n groot regmerkie aftik; en Victor Matfield en Bakkies Botha het kort ná mekaar die veld met bloedbeserings verlaat.
“Die Springbokke speel wel nog dieselfde soort rugby.
“Hulle is fisiek en die voorspelers baie groot, maar ek het opgelet dat hulle deesdae ook ’n hoër intensiteit en rykheid in hul spel het.
“Ons sal gereed wees,” het Lievremont gesê.
Bly op hoogte van al die jongste sportnuus deur Nuus24Sport op Twitter te volg.
- Die Burger