Rassie sal Bokke by WB help
2011-04-20 11:52
Kaapstad - Die afrigter en voormalige Springbok Rassie Erasmus sal deel wees van die Springbokke se bestuurspan by die Rugby-wêreldbeker in Nieu-Seeland later vanjaar.
Die uitgaande WP Rugby-voorsitter Pat Kuhn het aan die Cape Times bevestig dat Erasmus die Bokke tydens die Rugby-wêreldbeker sal help, maar dat hy in 2012 in sy huidige rol by die Westelike Provinsie sal voortgaan.
Die Springbok-afrigter Peter de Villiers sal na verwagting meer duidelikheid oor Erasmus se aanstelling gee wanneer hy Woensdag sy oefengroep van 49 spelers in Wellington sal aankondig.
"Om Rassie toe te laat om met die Bok-span se bestuur uit te help is iets wat van ons gevra is, so ons doen dit vir die land,’ het Kuhn gesê.
- Sport24