Rassie dra g’n wrok oor WP
2012-01-11 09:01
Kaapstad – Rassie Erasmus sal sakebelange nastreef nadat hy as direkteur van afrigting by die Westelike Provinsie bedank het.
Sport24 verneem dat Erasmus ’n nuwe afrigtingsprogram ontwikkel het en dat dit wêreldwyd – ook op die hoogste vlak in Suid-Afrika – belangstelling uitlok.
Erasmus sal nie langer tyd hê om sy aandag heeltyds op die pos by die Westelike Provinsie toe te spits nie.
Hy voel in elk geval sy werk is nou afgehandel omdat die Kaapse unie se strukture van junior vlak af seepglad verloop.
Hy is wel te vinde vir die gedagte om elders weer in spanverband betrokke te raak.
“Ek is te vinde vir enige geleentheid wat na my kant toe kom. My besluit sal neerkom op wat die beste vir my en my gesin sal wees.”
Hy dra geen wrok teenoor die WP nie, al word daar in die Kaap oor politiekery agter die skerms gemor.
“Nee, glad nie,” het Erasmus geantwoord toe aan hom gevra is of plaaslike politiek hom verdryf het.
“Niemand het my onwelkom laat voel nie. Ek het ondersteuning van 95% van die mense hier gehad. Die ander is die 5% wat nie ’n professionele opset verstaan nie.
Dis mense – van spelers tot administrateurs in hoë poste – wat voel die afrigter moet uit plaaslike geledere kom.”
Erasmus voel nie hy laat die Stormers of WP in die steek nie.
“Ek het van die begin af oop kaarte met Rob Wagner (besturende direkteur van WP-Rugby Edms Bpk) en die bestuurspan gespeel.
Die spelers glo aan hul afrigters en dis nie asof ek die span los en na plaaslike teenstanders gaan om geheime te gaan uitlap nie.”
Erasmus is al aan etlike poste gekoppel.
Sy naam word dikwels as ’n moontlike tegniese raadgewer in die nuwe Springbok-bestuurspan genoem, terwyl daar selfs nou sprake is dat hy in ’n oorsese span se bestuur kan dien.
– Vir die jongste sportnuus volg Nuus24Sport op Twitter.
– Sport24