Ramkat kan Cheetahs stootkrag gee
2011-10-13 12:57
Bloemfontein – Die Aussies moes met 16 manne (die skeidsregter ingesluit) die Springbokke klop en die Cheetahs kry nou ’n stel horings by om die gevaarlike Griekwas te klop.
Konsortium-Merino (KM) het ’n stewige merinoram genaamd Ramkat aan die Cheetahs geskenk om hulle stootkrag in Saterdag se Curriebeker-kragmeting te gee.
Mnr. Cobus Vivier van KM sê op 30 April teen die Brumbies het die Cheetahs in die Vrystaat-stadion in Bloemfontein uitgedraf met merinoramme as spesiale gelukbringers langs die veld.
Die tuisspan het toe drie agtereenvolgende wedstryde gewen.
Hulle hoop Ramkat, wat na verwagting die naweek ook langs die veld gaan staan, bring dieselfde geluk.
Die Cheetah-kaptein en -haker, Adriaan Strauss, sê die ram is miskien net die gelukbringer wat die span nodig het, want hulle moet die volgende drie wedstryde wen om die Curriebeker omhoog te hou.
Strauss sê hulle is baie positief oor Saterdag se buurstryd en sien daarna uit om voor hul tuisskare in Bloemfontein te speel.
Die Cheetahs het die afgelope seisoen ondersteuners se harte telkens gebreek omdat hulle dikwels in die tweede helftes uitgesak en seges deur hul vingers laat glip het.
Volgens Strauss het hulle verlede naweek teen die Pumas gewys hulle kan ’n hele wedstryd met die nodige durf speel om as oorwinnaars uit die stryd te tree.
“Ek dink ons het daardie siekte begrawe.”
Ramkat bly tot Saterdag by mnr. Hans Swanepoel van die Das Ram-boerdery in die Dewetsdorp-distrik.
Hierna is hy die Cheetah-span s’n en kan hulle hom verkoop as hulle wil. Vivier sê die jong ram spog met fynwol en robuuste vleiseienskappe.
Die ram is Dinsdagmiddag na die Vrystaat-stadion gebring toe die Cheetah-spelers geoefen het.
Konsortium-Merino is ’n teelgroep met meer as 100 boere en 240000 produserende ooie onder sy handelsmerk.
Hulle het vroeër vanjaar wolbaadjies aan die Cheetahspan gegee.
– Vir die jongste sportnuus volg Nuus24Sport op Twitter.
- Volksblad